Imajen/Media PN.

DILI, 02 fevereiru 2021 (TATOLI)–Komisaun E ne’ebé trata asuntu infraestrutura lideradu Deputadu Abel Pires da Silva, deteta jeradór haat (4) iha munisípiu Ainaro la funsiona.

Komisaun E kondidera sub-estasaun EDTL Cassa importante tanba hosi sub-estasaun refere bele transmite enérjia ba Kapitál Munisípiu Ainaro no postu administrativu viziñu balun.

Tanba, nia hateten, sub-estasaun refere uza ona sistema transmisaun iha distribuisaun enérjia elétrika ba komunidade iha Munisípiu Ainaro no enérjia nia hún mai hosi sentru EDTL Betano.

“Maibé diferesa ho kondisaun atuál iha Munisípiu Ainaro tanba sei uza de’it sistema manuál ou jeradór. Uza sistema transmisaun mak jeradór haat (4) iha Munisípiu Ainaro oras ne’e la funsiona maibé la’ós aat,” Sekretária Meza Komisaun E, Deputada Maria Ana Bela Sávio, ne’ebé akompaña hosi Prezidente Komisaun E, Deputadu Abel Pires Pires da Silva, aprezenta relatóriu fiskalizasaun ba plenária PN, tersa ne’e.

Iha relatóriu fiskalizasaun ne’e hateten, jeradór haat (4) ne’ebé eziste iha munisípiu refere oras ne’e desmontadu hela tanba hetan ona substituisaun hosi sistema transmisaun enérjia sentrál elétrika tantu Betano no mós Dili, maibé iha balun sei halerik hela tanba la asesu ba eletrisidade.

Konsumidór iha Munisípiu Ainaro nian, nia informa, hamutuk 8340 konstitui hosi kontadór pre-pagu 4027 no kontadór konvensionál 4313.

“Totál konsumidór 1063 iha Postu Administrativu Hatu-Builico seidauk monta sistema pre-pagu,” relatóriu Komisaun E ne’e haktuir.

Komisaun E (Infraestrutura) iha Parlamentu Nasionál, ne’e hala’o fiskalizasaun ba sub-estasaun ba Eletrisidade Timor-Leste (EDTL) Cassa, Munisípiu Ainaro, iha loron 14 to’o 17 outubru 2020 liubá.

Nune’e Komisaun E rekomenda ba Ministériu Obra Públika (MOP) liuhosi Autoridade Nasionál Eletridade, Emprea Públika (ANE,EP) atu fó solusaun ba jeradór ne’ebé la funsiona iha munisípiu Ainaro.

Nune’e mós sujere ba ANE,EP atu garante liután kualidade fornesimentu enérjia elétrika inklui tarifáriu nu’udar kontribuisaun atu hasa’e progresivamente reseita ba Estadu.

Komisaun E husu ba Governu atu estabelese sistema informasaun públiku kona-ba uza kontadór pre-pagu, presiza aplika sansaun ba aktu koneksaun ilegál.

Komisaun E ne’ebé trata asuntu infraestrutura propoin ba ANE, EP atu asegura nafatin fiskalizasaun kona-ba operasaun no manutensaun ba rede distribuisaun no fornesimentu enérjia elétrika ba kada sub-estasaun iha Munisípiu Ainaro.

Komisaun E fó hanoin ba ANE, EP atu mellora gradualmente kondisaun sira hosi ekipamentu operasionál tékniku EDTL tuir rekizitu ezijidu sira.

Iha parte seluk, Komisaun E husu MOP atu fó solusaun ba problema eis Seguransa Guarda Lorosa’e tanba la simu saláriu durante tinan rua (2) ona.

Komisaun E husu mós ba MOP atu fó konsiderasaun liuhosi avaliasaun ho promosaun estatutu b servidór voluntáriu hotu ne’ebé hala’o kna’ar profisionál liuliu diresaun EDTL iha Munisípiu Ainaro.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here