Imajen/Espesiál.

DILI, 01 fevereiru 2021 (TATOLI)–Parlamentu Nasionál (PN), OHIN, aprova ona faze jeneralidade hodi fó autorizasaun ba Governu halo alterasaun ba artigu balun iha Kódigu Prosesu Sívil (CPC-sigla portugés).

Proposta-lei Númeru 10/V/2 (ª)-autoriza Governu hodi halo alterasaun ba artigu balun iha Kódigu Prosesu Sivíl ne’e aprovadu iha faze jeneralidafe ho rezultadu votasaun a-favór 40 kontra 0 no abstensaun 9.

“Nune’e, proposta-lei ne’ebé fó autorizasaun ba Governu atu halo alterasaun ba Kódigu Prosesu Sívil aprovadu iha jeneralidade. Tuir mai espesilidade kaer nafatin prinsípiu katak laiha proposta, laiha diskusaun. Karik iha proposta entaun to’o 15.00 proposta tenke submete mai ona,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Aniceto Guterres hateten, bainhira laiha proposta hosi deputadu sira diskusaun sei la naruk.

Proposta ne’e submete hosi Ministru Justisa Manuel da Costa Cárceres, husu autorizasaun ba artigu rua iha Kódigu Prosesu Sívil, artigu 385 no artigu 388 hodi fleksibiliza prosesu nível saneamentu no organizasaun espesifikasaun no kestionáriu.

Razaun fundamentál ba intervensaun autorizasaun lejizlativa ne’e hodi aselera prosesu kazu pendente sira iha tribunál.

Ministru Justisa, Manuel da Costa Cárceres, funfamenta razaun husu autorizasaun tanba durante ne’e operadór judisiáriu enfrenta difikuldade, prinsipalmente juis sira-ne’ebé organiza espesifikasaun no kestionáriu.

“Ne’e husu autorizasaun ba parlamentu atu governu halo alterasaun pontuál ba artigu 385 no artigu 388, liuliu prosesu saneamentu nian, nune’e fó flexibilidade ba juiz sira hili mekanismu tuir rekizitu legál para bele aselera prosesu sivíl ne’ebé pendente,” Ministru Justisa, Manuel da Costa Cárceres, ba Agência TATOLI, segunda ne’e. 

Entretantu, Prezidente Komisaun A (Justisa no Konstitusionál), Deputadu Joaquim dos Santos, hatutan Governu husu autorizasaun ne’e atu formula fali norma sira ligadu ho prosesu saneamentu ne’e.

“Intensaun ne’e atu fasilita prosesu nune’e labele iha kazu pendente sira iha tribunál,” Deputadu Boraluli hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here