Ekipa peskizadór INIRHILITL sira mak Domingos Sávio, Anita Gama, Alipio Seixas Henriques, Elder Pereira, no Martinho Pereira. Imajen/Espesiál.

DILI, 01 fevereiru 2021 (TATOLI)—Institutu Nacional de Investigação e Recuperação da História Pela Luta da Independéncia de Timor-Leste (INIRHILITIL), aban, sei lansa livru rua mak livru “Baze Apoiu” no “Funu & Ai-Han Falintil” iha selebrasaun tinan-20 Falintil-Forsa Defeza Timor-Leste (F-FDTL). 

Diretór Jerál INIRHILITIL, Domingos Sávio, hateten livru rua refere sei lansa hamutuk ho livru ida kona-ba dezenvolvimentu Falintil-Forsa Defeza Timor-Leste (F-FDTL) ho titulu “Rariskak Hakat Forsa-Defeza Timor-Leste Hori Otas Moris Nian To’o Agora Ne’e Daudaun” ne’ebé hosi Gabinete F-FDTL prepara.

Atual Administradór Munisípiu Lautém ne’e haktuir, livru rua ne’ebé INIRHITIL prodús ne’e bazea ba peskiza ne’ebé lori tempu naruk. Iha peskiza ne’e, nia dehan, hetan obstakulu lubuk ida mak sir abele hetan memória istória pasada ne’ebé Falintil no gerrilleiru sira enfrenta iha ai-laran durante tinan 24 nia laran, liuliu iha funu no periódu baze de apoiu ne’ebé nia rasik hakerek.

Kapa-oin livru “baze Apoiu”. Imajen/Espesiál.

“Livru ‘Baze Apoiu’ ne’e, ha’u hakerek kona-ba akontesimentu ka eventu sira ne’ebé mak akontese  iha baze de apoiu. Livru ne’e hamutuk kapitulu 10 ho pájina hamutuk 290. Kapitulu I; Introdusaun, Kapitulu II; Review Literatura, Kapitulu III; Métodu no Metodolojia Hakerek, Kapitulu IV; Organiza Kria Baze de Apoiu no Organiza Populasaun halo Produsaun, Kapitulu V; Konflitu Onternál no Fuzilamentu, Kapitulu VI; Intrepretasaun Ideolojika Fretilin, Kapitulu VII; Diferensa Estratejia, Reasionáriu no Traidór, Kapitulu VIII; Antagonizmu Versaun Protagonizmu Lideransa, Kapitulu IX; Estrutura Polítika no Militár iha Baze de Rezisténsia, no Kapitulu X; Lian Maktaka,” Diretór Jerál HINIRHILITIL no Atual Adminstradór Munisípiu Lautem, Domingos Sávio, hateten ba Agência TATOLI liuhosi WhatsApp (WA), segunda ne’e.

Nia hatutan, nia hakerek livru “Baze Apoiu” inspira hosi Falintil no gerrilleiru sira-nia kondisaun halo funu iha ai-laran ho kondisaun mínimu maibé lider no autór ba funu ne’e brani organiza no halo funu hasoru inimigu sira to’o Timor-Leste hetan independénsia.

“Obstakulu ne’ebé ha’u hasoru mak autór no funu-na’in sira difisil tebes fornese dadus ba peskizador sira atu hakerek. Maibé, ha’u apriende hosi sira-nia lideransa ho pasiénsia, dixiplina, no iha kapasidade organiza hodi halo funu ne’e to’o ramata,” nia hateten.

Livru ne’ebé nia hakerek, tuir nia, hanesan livru ida-ne’ebé nakonu ho faktu sira hanesan teze ida ema seluk bele hamosu anti teze no to’o ninia sintesa. Tanba, nia hamosu livru ida-ne’ebé loos no ema hotu bele lee no sai riku soin ida jerasaun foun sira iha futuru ka loron aban ne’ebé sei mai.

Iha inisiu, nia dehan, iha preokupasaun boot bainhra funu-nain sira balun lakon ida ba ida maibe seidauk iha ema ruma iha inisiatif hodi ba rekoila dadus hosi sira, entaun bainhira Saudozu Xavier do Amaral mate ne’e hanesan Timor-Leste soe hela dizionáriu boot ida ba tahu laran entaun akontesimentu ida-ne’e mak dudu sira ba husu veteranu sira atu hari HINIRHILITIL no hahú hakerek.

“Objetivu atu konserva istória luta Timor-Leste nian no iha loron ruma bele sai materia ida hodi bele fó hanorin iha eskola katak funu libertasaun nasional ne’e sosa raan no ruin ne’ebé karun tebes. Atu nune’e, bele hamosu jerasaun foun sira-nia patriotizmu no nasionalizmu foun hodi dignifika sira-nia luta-na;in sira no nasaun,” nia esplika.

Tanba ne’e, nu’udar eskritór ba livru “Baze Apoiu”, nia parte husu ba juventude no jerasaun foun sira atu labele baruk estuda liuliu tenke badinas lee no badinas hakerek atu labele tauk halo sala.

“Ha’u-nia mensajen ba joven sira, badinas lee no buka atu hatene. Lalika tauk hakerek. Lalika tauk sala. Hosi ita-nia sala, ita hodi aprende di’ak liután,” nia hameno ba joven sira.

INIRHILITIL harii iha 2014 ne’ebé lidera hosi Prezidente, Major Jenerál Lere Anan Timur, ho nia misaun lulik sira mak  sai hanesan instituisaun peskiza nian ne’ebé ho objetivu atu atinje kualifikasaun aas hosi obra sira liuhosi eskrita, artistiku no siéntifiku, iha nasional no internasional; Respeita atividade peskizadór sira-nian no uza sira-nia matenek hodi kria kondisaun atu sidadaun Timor-Leste bele asesu istória luta ba libertasaun nasional.

INIRHILITIL nia misaun seluk mak halo promosaun no organiza asaun atu suporta no habelar istória luta ba ukun rasik aan, ho hanoin ida atu públiku ka sidadaun Timor-Leste be komprende ho di’ak no INIRHILITIL esforsu ba umanidade no komunidade sosiál, iha kuadu umanistiku nian, valór pesoál, toleransia, servisu hamutuk iha rai-laran no rai-li’ur no mós hakruuk ba direitu umanu.

Jornalista: Osória Marques

Editór: Cancio Ximemes

HAKEREK NO HATÁN

Please enter your comment!
Please enter your name here