Suspeitu joven mane kondúz motór marka Vario, koor kinur, soke labarik feto ida ho nia inan iha área estrada Matadouro, Dili. Imajen/espesiál

DILI, 29 janeiru 2021 (TATOLI)–Suspeitu joven mane ida ne’ebé kondúz motór Honda Vario 125 koor kinur, kinta (28/01), soke labarik feto ida ho nia inan iha área estrada Matadouro, Dili, entrega an ona ba Polísia Munisípiu Dili.

Portavóz Komandu Jerál PNTL, Superintendente Xefe, Arnaldo de Araújo deklara suspeitu rekoñese nia kondúz motór ho velosidade, la uza kapasete no tula nia alin atu fila bá uma, derepente labarik ho nia inan halai korta estrada, no suspeitu lakon konsentrasaun, entaun hakfodak soke labarik monu latan ba rai to’o dezmaia.

“Hafoin soke, suspeitu halai liu. Depois kalan suspeitu sente ladi’ak mai entrega an ona iha Polísia Munisípiu Dili,” Arnaldo ba jornalista iha Kuartél Jerál PNTL, Caicoli, Dili, sesta ne’e.

Arnaldo hatutan, suspeitu entrega an ba polísia tanba nia rasik trauma bainhira haree gravasaun vídio Closed-Circuit Television (CCT) konsege espalla iha rede sosiál faceebok.

PNTL seidauk bele fó-sai identidade suspeitu nian, tanba sei hein mós família hosi vítima bele aprezenta keixa ba polísia.

“PNTL hein hela tanba vítima seidauk hato’o keixa mai polísia,” nia hateten.

Suspeitu entrega mós motorizada ne’ebé nia kondúz ba polísia hodi fasilita suspeitu buka tuir família vítima hodi haree kondisaun labarik no rezolve problema ho di’ak.

Arnaldo hatutan, hafoin akontesimentu, populasaun ajuda tula kedas labarik ho nia inan bá Ospitál Nasionál Guido Valadares (HNGV-sigla Portugeza) hodi hala’o tratamentu saúde.

Parte PNTL mós halo ona identifikasaun ba fatin akontesimentu no rekolla informasaun hosi sasin balun no labarik nia inan.

Tuir informasaun hosi parte PNTL, labarik ne’e ho nia inan foin sai hosi eskola, atu fila bá uma mak hasoru dezastre ne’e.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here