Ilustrasaun karreta kontentór movimenta iha estrada públiku. Imajen/Espesiál

DILI, 29 janeiru 2021 (TATOLI)–Diretór Jerál Ministériu Transporte no Komunikasaun, Gaspar de Araújo afirma hahú 01 fevereiru 2021, karreta sira ne’ebé tula kontentór hodi halo sirkulasaun Dili sei halo operasaun tuir oráriu operasaun.

“Atu hamenus engarrafamentu iha estrada Dili laran, Governu liuhosi Ministériu Transporte no Komunikasaun (MTK), Ministériu Interiór (MI) ho entidade sira seluk hanesan Autoridade Portuarias de Timor-Leste (APORTIL) no Polísia Nasionál Timor-Leste, iha 05 janeiru liubá, hasai ona despaisu ba kareta tula kontentór sira,” Gaspar ba jornalista iha edifísiu APORTIL, Portu Dili, sesta ne’e.

Nia esplika, tuir oráriu ne’ebé mak iha, hosi dadeer tuku 07:00 to’o 09:00 labele la’o, iha meudia 12:00 to’o 14:00 labele la’o no labele la’o iha lorokraik tuku 17:00 to’o 21:00.

“Ami husu ba ami-nia parseriu sira atubele kumpri despaisu ida-ne’e, tanba despaisu sai ho sansaun. Se la kumpri ka la obedese ba despaisu ne’e sei hetan sansaun. Bazeia ba artigu 10 Kódigu Estrada, infrasaun másimu $75” Gaspar informa.

Nia dehan, karreta pezadu sira-ne’e bele halo operasun dentru oráriu, ezetu kestaun emerjénsia.

Iha fatin hanesan, Komandante Tránzitu Nasionál, Superintendente Xefe, João Belo afirma katak parte polísia tránzitu sei ezekuta despaisu refere ho rigorozu.

“Bazeia ba despaisu konjuntu ne’ebé mak iha ona, parte polísia tránzitu sei implementa ida-ne’e ho rigorozu,” nia promete.

Nune’e mós, Vise Prezidente Kámara Komérsiu no Indústria Timor-Leste  (CCI-TL, sigla Portugeza) trata asuntu transporte, Fernando da Silva hateten ninia parte konkorda ho despaisu ne’ebé Governu hasai tanba nu’udar meiu atu regula di’akliu transporte sira liuliu karreta boot nia operasaun.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here