Populasaun suku Cribas kontente tanba bele asesu bee-moos. Imajen/IPG

DILI, 28 janeiru 2021 (TATOLI)—Populasaun 2.800-resin suku Cribas, postu administrativu Manatuto, munisípiu Manatuto, sei la susar ona ba bee-moos iha tempu oin mai, tanba tuir estudu Institutu Petróleu no Jeolojia (IPG, sigla portugés) identifika iha rezervatóriu bee iha rai-okos.

“Sente kontente no orgullu tebes tanba bele kontribui ba populasaun, tanba antes ne’e la hatene katak iha Cribas ne’e rai-okos iha bee, maibé liuhosi aprosimasaun sientífika no tékniku ho dalan estudu aspetu jeolojia no utiliza ekipamentu jeofízika (resistivity meter), ikus mai aprova perfurasaun ba akiferu hatudu iha rezervatóriu bee-moos iha rai okos,” Prezidente IPG, Gabriel Aparício, relata ba Agência TATOLI, via telefónika, kinta ne’e.

Hafoin liu tinan 40, desde okupasaun Indonézia to’o tempu independénsia, suku Cribas sempre enfrenta susar bee-moos, liuliu iha tempu bailoron, ne’ebé halo populasaun la’o kuaze kilómetru 1 hodi kuru bee iha mota laran.

Gabriel Aparício dehan, hanesan instituissaun Estadu ne’ebé haree ba kestaun rekursu petróleu no gás, minerál, idrogeolojia, no mós risku jeolójiku, foti ona inisiativa hodi solusiona difikuldade povu Cribas.

Aleinde ne’e, sientifikamente objetivu halo peskiza maka atu hatene distribuisaun akiferu laterál no vertikál iha área refere.

Husi rezultadu pumping test liu oras 72, hatudu rezerva bee-moos iha rezervatóriu ne’ebé boot tebes.

Biban ne’e IPG agradese ba pesoál sira iha suku Cribas ne’ebé fó apoiu másimu hodi bele realiza peskiza no perfurasaun.

Agradese mós apoiu departamentu jeolojia no petróleu, Universidade Nacional Timor Lorosa’e (UNTL) liuhosi apoiu ekipamentu  resistivity meter ne’ebé hanesan doasaun husi Japan International Corporation Agency (JICA).

Entretantu, IPG hanesan instituisaun Governu Timor-Leste ne’ebé estabelese iha 18 jullu 2012 husi dekretu lei númeru 33/2012, ho objetivu prinsipál mak atu halo investigasaun sientífika no koleta dadus jeolojia iha Timor-Leste, hanesan gás, petróleu, rekursu minerál, bee inklui risku jeolójiku.

Institutu ne’e planea ona halo estudu iha munisípiu Covalima, postu administrativu Suai, suku Hoges.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here