Diretór Ezekutivu BNCTL, Brígido de Sousa. Imajen TATOLI/António Gonçalves

DILI, 28 janeiru 2021 (TATOLI)—Banku Nasionál Komérsiu Timor-Leste (BNCTL, sigla portugés) hahú ohin simu pagamentu propina estudante Univerdade Nacional Timor Lorosa’e (UNTL) iha sukursál hotu.

“Fó hatene ba estudante UNTL hotu katak hahú husi loron 28 janeiru, BNCTL kontinua simu fali pagamentu propina iha sukursál hotu, ne’ebé tuir oráriu ba re-inskrisaun semestre impar tinan akadémika 2021, ne’ebé fó sai husi Diresaun Nasionál ba atendimentu estudante,” refere nota ne’ebé agência TATOLI asesu, iha kinta ne’e.

BNCTL sei la halo atendimentu ba sira ne’ebé la tuir oráriu re-inskrisaun no sira ne’ebé la kumpre regra prevensaun surtu.

Banku nasionál ne’e mós husu ba estudante sira ne’ebé atu selu propina, tenke kumpre regra prevensaun COVID-19 hanesan uza máskara, fase liman ho sabaun no halo distánsiamentu fíziku.

Antes ne’e, iha kuarta (28/01), liuhosi konferénsia imprensa BNCTL informa, suspende provizóriu atendimentu ba estudante UNTL hodi hein desizaun hosi jestór universidade, tanba antes ne’e seidauk estabelese regulamentu hodi regula estudante bainhira atu selu.

Regulamentu ne’ebé Diretór Ezekutivu, Brígido de Sousa, refere maka  iha dekretu Governu ba impelementasaun Estadu Emerjénsia (EE) ligadu ho COVID-19 iha Timor-Leste.

“BNCTL estabelese unidade ida iha UNTL atu atende estudante sira selu propina, maibé agora daudaun ha’u lakohi fó sala ba universidade, ita iha hela Estadu Emerjénsia ne’ebé tenke aplika distansiamentu sosiál, uza máskara, no fase liman, maibé estudante sira dudu malu, butuk hamutuk, no ami husu sira atu kumpre maibé lakohi,” Diretór Ezekutivu banku klarifika, iha salaun reuniaun Obrigado Barack, Caicoli, kuarta ne’e.

Tuir Dirijente banku nasionál ne’e, durante ne’e parte BNCTL fó ona instrusaun tenke halo tuir regra saúde públika, maibé estudante lakohi kumpre, enkuantu universidade lakohi regula.

“Pior liután universidade hasai regra hodi limite selu propina. Ami ko’alia bebeik ho jestór UNTL ona katak tenke hadi’a kondisaun ne’e atu evita estudante sira dudu malu, no dala ruma sira tolok ami-nia funsionáriu sira,” nia akresenta.

Ho hanoin hirak ne’e, maka BNCTL sujere ba UNTL atu halo jestaun di’ak ba pagamentu propina, nune’e labele fó todan ba banku.

Biban ne’e, Direjente banku husu ba jerente sukursál sira iha munisípiu atu labele atende estudante sira husi Dili bá selu propina iha munisípiu no sei fó prioridade ba sira hela iha munisípiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here