Sekretáriu Estadu Juventude no Desportu, Abrão Saldanha. Imajen SEJD/Dok.

DILI, 27 janeiru 2021 (TATOLI) –Sekretaria Estadu Juventude no Desportu (SEJD) koopera ho Governu Nova Zelándia liuhosi nia embaixada iha Timor-Leste hodi servisu hamutuk hodi haree ba dezenvolvimentu setór juventude.

“Durante ne’e Nova Zelándia apoiu buat barak ba ita-nia governu liu-liu iha area edukasaun, agrikultura, seguransa no seluk tan. Ohin, ami tur hamutuk ko’alia ona oinsá ba oin bele servisu hamutuk hodi dezenvolve setór juventude nian,” Sekretáriu Estadu Juventude no Desportu  Abrão Saldanha, hateten ba jornalista hafoin reuniaun ho Embaixadór Nova Zelándia iha Timor-Leste, Philip Hewitt, iha edifísiu SEJD, Lecidere, Dili, kuarta ne’e.

Nia dehan, Nova Zelándia ba tinan ne’e iha atividade barak liga ho juventude. Tanba ne’e mak parte rua tur hamutuk hodi diskute iha tempu besik bele implementa programa hirak ne’e hodi fó benefísiu ba joven liu-liu iha area rural.

“Prioridade ami nian atu servisu hamutuk ne’e mak oinsá atu masimiza sentru juventude sira iha munisípiu, atu sai hanesan espasu ida ba joven sira hodi aprende no halo buat ruma hanesan formasaun no iha atividade oioin mak ita sei halo iha ne’ebá, nune’e bele promove kriatividade joven sira nian,” Abrão Saldanha hateten.

Nia hatutan, Governu Nova Zelándia mós iha ona planu kona-ba oinsá atu fó formasaun ba joven sira iha area oioin hanesan agrikultura, fan sasán iha produtu agríkola, promove area turizmu no seluk tan.

Embaixadór Nova Zelandia iha Timor-Leste, Philip Hewitt. Imajen/Egas Cristovão

Iha fatin hanesan embaixadór Philip Hewitt hatete, apoiu Nova Zelándia nian ba Timor-Leste hanesan meiu ida hodi hametin liután kooperasaun entre nasaun rua nian.

“Nova Zelándia apoiu Timor-Leste iha area oioin ona, ami nia apoiu ba juventude sira iha Timor-Leste sei realiza duni iha area oioin hanesan edukasaun, seguransa, agrikultura no seluk tan, ida ne’e meiu ida hodi hametin liu tan kooperasaun nasaun rua nian,”  nia hateten.

Embaixadór Philip Hewitt relata, Nova Zelándia iha tinan ne’e nafatin apoiu Timor- Leste hodi hala’o dezenvolvimentu liu-liu iha area agrikultura no edukasaun.

“Ami nafatin apoiu Timor-Leste liu hosi akordu ne’ebé mak halo ona ho governu, liuliu iha area agrikultura oinsá hasae liu-tan produtu lokál sira,” nia tenik.

Nova Zelándia mós tau prioridade oinsá dezenvolve setor edukasaun liuliu iha pre-eskolár, fó mós formasaun ba profesór sira nune’e bele hasae di’ak liután kualidade edukasaun iha nasaun ne’e.

Nia dehan, maski agora daudauk situasaun Covid-19 ne’ebé nasaun hotu iha mundu enfrenta, maibé kooperasaun servisu entre nasaun rua nafatin lao ba oin.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here