Komunidade simu Cesta Bázika. Imajen TATOLI/Dok

DILI, 27 janeiru 2021 (TATOLI)–Banku Nasionál Komérsiu Timor-Leste (BNCTL, sigla portugés) fasilita ona empreza balun liuhosi kréditu hodi sosa produtu ba implementasaun programa Cesta Bázika.

“Kompañia 20-resin ona maka hetan apoiu finansiamentu hosi BNCTL atu ajuda sira sosa sasán fornese ba komunidade liuhosi programa Cesta Bázika. Apoia husi banku ne’e hanesan apoia inisiál de’it,” Diretór Ezekutivu BNCTL, Brígido de Sousa, informa ba Agência TATOLI, iha salaun enkontru Obrigadu Barack, Caicoli, kuarta ne’e.

Notísia relevante: Aprovizionamentu akizisaun produtu Cesta Bázika uza modalidade adjudikasaun direta

Direjente banku nasionál ne’e dehan, apoia finanseiru ne’ebé banku fó tanba Governu halo ona aproximasaun ho banku, nune’e bazeia ba proposta empreza sira mak ikus mai banku aprova hodi realiza apoiu ne’e.

“Empreza sira ne’ebé hetan kontratu husi instituisaun tolu ne’e hodi sosa produtu Cesta Bázika hodi fahe ba komunidade sira tuir kontratu ho Governu, ne’ebé bazeia ba kontratu ne’e tanba sira mós iha limitasaun fundu atu sosa produtu sira, entaun sira mai BNCTL no ami haree sira-nia kontratu, konfirma ho ministériu implementadór, bainhira ami halo analiza tuir prosedimentu, sira prienxe duni rekezitu hotu entaun banku fó kréditu hodi sosa sasán,”  Brígido esplika.

Empreza sira ne’ebé kréditu iha BNCTL ne’e balun kréditu foti $100.000 to’o $300.000.

“Governu seidauk tau osan iha BNCTL hodi fó kréditu ba kompañia sira, iha orsamentu ne’ebé Governu prevee ona husi orsamentu ne’e, fiar katak ministériu sira hasai kontratu sira ne’e. Iha  kontratu signifika iha orsamentu, tanba orsamentu ne’ebé alokadu ba programa Cesta Bázika hamutuk  millaun $70,” nia hatutan.

Tuir kontratu ne’ebé BNCTL simu ba implementasaun Cesta Bázika, tarde liu to’o 28 fevereiru, tanba atu apoia Governu, ninia jurus ne’ebé mak banku aplika mak 7% kada tinan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here