Prezidente KKFP, Juvinal Dias. Imajen/Espesiál

DILI, 26 janeiru 2021 (TATOLI)–Konsellu Konsultivu Fundu Petrolíferu (KKFP) nota katak durante ne’e Governu la respeita lei númeru 9/2005 fundu petrolíferu, iha artigu 9 kona-ba transferénsia liu Rendimentu Sustentável Estimadu (RSE), tanba ne’e konsellu husu ezekutivu sira halo ezersísiu oituan no buka alternativa.

“Ami-nia kalkulasaun kuandu nível despeza hanesan deskreve iha orsamentu 2021 no rendimentu doméstika, retornu investimentu hanesan orsamentu Estadu nia figura, maka ita-nia fundu petrolíferu sei la aguenta atu finansia Orsamentu Jerál Estadu (OJE) 2031. Tanba ne’e, ami sujere Governu tenke hahú respeita regra RSE no tenke aumenta kapasidade produsaun atu hetan reseita doméstika subtitui osan husi fundu petrolíferu,” Prezidente KKFP, Juvinal Dias, hateten ba Agência TATOLI, iha sede Haburas, Farol, tersa ne’e.

Notísia relevante: Governu foti millaun $830 liu RSE tanba hasoru resesaun ekonómika

OJE 2021 ho montante biliaun $1,895, ne’ebé foti husi reseita fundu petrolíferu hamutuk biliaun $1,377 no reseita naun petrolíferu millaun $508.

Enkuantu, husi totál reseita fundu petrolíferu biliaun $1,377 no millaun $547 foti bazeia ba RSE no transferénsia superior liu RSE millaun $829.

Ho postura orsamentu ne’e, konsellu konsidera fundu soberanu sei la sustentável, tanba lei fundu petrolíferu mensiona atu garante sustentabilidade fundu petrolíferu, Governu iha obrigasaun atu respeita regra RSE.

Tuir Juvinal, RSE la hamriik mesak, tanba ne’e Governu bele foti de’it 3%, ho esperansa investimentu fundu petrolíferu bele hetan rendimentu 3%.

“Bainhira despeza 3% no osan inan la book mak hanaran sustentabilidade no ita uza finansia atividade finanseiru Estadu. Maibé infelizmente osan inan no funan mós ita halo hotu, rendimentu ba fundu petrolíferu hamutuk biliaun $30, tanba sura hamutuk rendimentu profit oil, taxa, ho retornu investimentu fundu petrolíferu,” nia esplika.

Nia dehan, biliaun $23 mai husi atividade tasi, maibé biliaun $7 mai husi investimentu fundu petrolíferu.

“Husi biliaun $30 agora iha de’it biliaun $17, signifika katak gasta lubuk ona, ne’ebé loloos despeza biliaun $13 ne’e tenke hanesan ho retornu investimentu maibé retornu ne’e menus biliaun $7 no despeza maka a’as liu,” nia akresenta.

Entretantu, iha artigu 9 d. lei fundu petrolíferu, mensiona katak bainhira Governu foti orsamentu finansia despeza OJE, maka presiza esplikasaun detalladu kona-ba motivu ne’ebé konsidera hanesan interese Timor-Leste ba longu prazu, atu efetua transferénsia ho montante superiór RSE.

Antes ne’e, iha loron 30 novembru 2020, iha ámbitu diskusaun Proposta OJE 2021 iha faze jeneralidade iha plenária Parlamentu Nasionál, Primeiru-Ministru, Taur Matan Ruak, argumenta katak razaun Governu foti millaun $830 liu RSE tanba Estadu enfrenta resesaun ekonómika maka’as iha tinan ikus tanba impaktu husi COVID-19, ne’ebé bele fó ameasa padraun  no kualidade moris.

Bazeia ba relatóriu trimestrál husi Banco Central de Timor-Leste (BCTL) iha novembru 2020, kapitál fundu petrolíferu sa’e ba biliaun $18,47, ne’ebé iha trimestrál anteriór ho kapitál  biliaun $18,07, ne’ebé kontribui husi royalties hamutuk millaun $43,53.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here