Servisu aéreu. Imajen/Anac

DILI, 26 janeiru 2021 (TATOLI)Parlamentu Nasionál (PN) aprova ona proposta lei númeru 4/V/2a, kona-ba akordu servisu aéreu entre Governu país rua iha faze jeneralidade, ho rezultadu votasaun a-favór 45, kontra rua no abstensaun 12.

“Ho nune’e proposta lei kona-ba akordu servisu aéreu entre Governu Repúblika Demokrátika Timor-Leste (RDTL) no Governu Austrália aprovadu iha faze jeneralidade,” Prezidennte Parlamentu Nasionál, Aniceto Longuinhos Guterres Lopes, anúnsia liuhosi plenária PN, tersa ne’e.

Lejizlasaun ne’e asina ona hosi país rua iha tinan 2017 no ratifika ona husi Austrália, maibé parte Timor-Leste seidauk.

Nune’e, proposta rezolusaun ne’e bazeia ba parte rua nia hakarak atu promove sistema aviasaun internasionál ne’ebé iha konkorrénsia entre empreza transporte aéreu sira iha merkadu ho servisu ne’ebé kompetitivu, inovadór no seguru sira.

Aleinde ne’e, akordu ne’e ho objetivu asegura nível másimu seguransa no protesaun internasionál, hodi afirma filafali preokupasaun séria kona-ba aktu no ameasa sira kontra seguransa aeronave.

Ho ratifikasaun akordu ne’e, kompañia aérea sira sei bele tama iha espasu aéreu país rua, ne’ebé la presiza autorizasaun prévia maibé bainhira kumpre ona rekizitu regulamentár inklui seguransa sei permite hasa’e konkorrénsia ne’ebé bele hamenus folin billete no transporte merkadoria sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here