Governu Repúblika Populár Xina fó apoiu doasaun uniforme ba Komandu Polísia Nasionál Timor-Leste (PNTL). Imajen/PNTL.

DILI, 26 janeiru 2021 (TATOLI)–Governu Repúblika Populár Xina liuhosi Embaixada Xina iha Timor-Leste, fó apoia doasaun uniforme ba Komandu Polísia Nasionál Timor-Leste (PNTL).

Uniforme sira-ne’e kompostu hosi sapatu botas hamutuk 4500, sintu 4500, kapa udan 4200 no fatin tau bee hemu ka kantíl 350. Apoiu ba ekipamentu hanesan kantíl ne’e sei oferese de’it ba membru Unidade Patrollamentu Fronteira (UPF) bainhira halo partrollamentu iha liña fronteira.

Apoiu ne’e entrega direta hosi Embaixadór Repúblika Xina ba Timor-Leste, Xiao Jiangu, ba Komandante Jerál PNTL, Komisáriu Polisia, Faustino da Costa akompañadu hosi komandante unidade sira.

Embaixadór Xiao dehan, apoiu ne’e Governu Xina fó atu ajuda membru polísia sira bele utiliza hodi hala’o sira-nia servisu ho di’ak liután implementa lei no órden.

“Ha’u fiar katak ho doasaun ne’e sei hasa’e kapasidade instituisaun PNTL nian liuliu membru sira iha liña fronteira hodi hasoru pandemia COVID-19 no ajuda sira hodi hala’o servisu ho efisiénsia liután,” Embaixadór Xiao tenik liuhosi karta komunikadu imprensa ne’ebé Agéncia Tatoli asesu hosi Komandu Jerál PNTL, tersa ne’e.

Diplomata ne’e hatutan, dezde problema COVID-19 akontese, Xina sempre fó apoiu ba Governu Timor-Leste hodi luta hasoru propagasaun surtu COVID-19.

“Dezde surtu COVID-19, Governu Xina ho konsistente ajuda Timor-Leste hanesan apoiu dahuluk Governu Xina ninian ba situasaun COVID-19, embaixada Xina mós apoiu ona máskra hamutuk 30.000 direta ba PNTL no 80.000 ba Governu Timor-Leste liuliu ba Ministériu Interiór. Doasaun ohin ne’e ba PNTL hanesan meiu seluk ida hodi hametin liután kooperasaun entre nasaun rua,” nia hateten.

Iha fatin hanesan, Komandante Jerál PNTL, Komisáriu Polísia, Faustino da Costa hato’o agradesementu ba Governu Xina ne’ebé apoiu rezolve difikuldade ne’ebé PNTL enfrenta.

“Sasán hirak ne’ebé ita hetan ne’e la’ós apoiu hosi Embaixada Xina maibé apoiu ida-ne’e dala-barak no beibeik ona nu’udar kontinuasaun ba PNTL tanba apoiu sira seluk ne’ebé hosi Repúblika Populár Xina ba Timor-Leste liuliu iha PNTL mak hanesan apoiu ba Unidade Espesiál ho ekipamentu seguransa ba iha parte EOD ninian, apoiu ró patrollamentu ba Unidade Polísia Marítima (UPM) ne’ebe inísia kedas dezde tinan 2005 no ohin loron ita iha hodi halo servisu hanesan mós apoiu rádiu komunikasaun ba PNTL no mós kamera vizilánsia ka CCTV sira ne’ebe ohin loron eziste,” Fuastino haktuir.

Komisáriu Fuastino hatutan, apoiu ne’ebé Xina oferese komandu PNTL sei fahe ba komandu unidade hotu-hotu tuir sira-nia nesesidade.

Komandu PNTL espera, bá-oin, Governu Xina kontinua fó sira-nia apoiu ba Komandu PNTL iha área importante seluk tan.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here