Koordenadór nasionál TLCE, José Monteiro. Imajen Tatoli/Tomé Amado

DILI,25 janeiru 2021 (TATOLI)–Relatóriu monitorizasaun Timor Leste Coalition for Education (TLCE) ba programa eskola bá uma hosi Ministériu Edukasaun Juventude no Desportu (MEJD) iha ámbitu COVID-19 no Estadu Emerjénsia (EE) hatudu katak, estudante hosi munisípiu neen (6) mak la aproveita ho di’ak.

Koodenadór nasionál TLCE, José Monteiro temi munisípiu neen ne’e mak hanesan Ainaro, Ermera, Lautém, Manatutu, Liquiçá no Dili mak la aproveita ho di’ak tanba difikuldade oi-oin.

“Ita haree nível aproveitamentu estudante iha munisípiu neen durante surtu COVID-19, hosi área urbana no rurál laiha diferensa bo’ot. Difikuldade ne’ebé sira hasoru maka, laiha televizaun, eletrisidade, telefone android, la komprende matéria,” José Monteiro hateten ba jornalista Agência Tatoli iha serbisu fatin, Caicoli, segunda ne’e.

Iha relatóriu ne’ebé publika ona hatudu katak, iha área urbana munisípiu Lautém pursentu 17, Liquiçáa pursentu 25, Ainaro pursentu 7, Dili pursentu 25, Manatutu pursentu 17 no Ermera pursentu 9.

Iha fali área rurál munisípiu Lautém pursentu 13, Liquiçá pursentu 26, Ainaro pursentu 6, Dili  pursentu 27, Manatutu pursentu 16 no Ermera pursentu 12.

Jose Monteiro afirma mós katak, planu no programa Ministériu nian dehan, bainhira estudante sira iha área rurál mak la asesu ba liña internet, MEJD sei fasilita ho livru atu nune’e estudante sira bele estuda tuir grupu.

“Maibé, realidade hatudu katak, munisípiu ne’e la hetan distribuisaun livru tanba livru la to’o ba estudante sira. Livru sira ne’ebé distribui durante surtu COVID-19 ne’e barak liu mak livru ensinu pré eskolár nian,” nia hateten.

Hosi relatóriu ne’e mós deskobre katak, partisipasaun profesór sira nian iha munisípiu neen ne’e, munisípiu Ainaro no Ermera barak liu mak la hatene programa eskola bá uma.

“Bainhira tama ona situasaun Estadu emerjénsia, profesór sira hosi munisípiu rua ne’e preokupa ona ho sira nia to’os. Estudante sira mós halo grupu hodi hamo’os ema nia to’os. Sá tan inan-aman sira laiha koñesimentu adekuadu oinsá tulun oan-sira bainhira hetan difikuldade ba konteúdu matéria sira ne’e,” nia subliña.

Haree ba realidade ne’e TLCE rekomenda katak, seidauk bele iha kondisaun atu re-ativa fali eskola tanba infraestrutura atu garante distansiamentu fíziku entre estudante ho profesór sira, nune’e difísil atu kontrola bainhira iha interasaun ruma iha eskola.

Alende ne’e, presija halo sosializasaun nasionalmente kona-bá programa eskola bá uma, kompleta konteúdu matéria no hasa’e kualidade aprezentasaun ne’ebé atrativu liu, inklui enfatiza partisipasaun inan-aman nian iha programa ne’e.

Ikus liu, kontinua imprime livru sira tuir disiplina no númeru estudante, hodi distribui ba estudante hotu-hotu.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here