Ministru Defeza, Filomeno da Paixão de Jesus. Imajen TATOLI/Egas Cristovão

DILI, 25 janeiru 2021 (TATOLI)–Ministru Defeza, Filomeno da Paixão de Jesus informa ba Prezidente Repúblika, Francisco Guterres Lú Olo kona-ba prosesu implementasaun servisu Autoridade Marítima Nasionál (AMN) sei iha faze konsultasaun kle’an ho liña ministériu sira ne’ebé envolve.

Filomeno dehan, ekipa Komandu F-FDTL durante tinan 2020 nia laran konvida ona  reprezentante interministeriál hodi diskute prosesu fahe kompeténsia servisu.

Governu rasik kontinua akompaña ekipa Komandu F-FDTL hodi sosializa formatu servisu no estrutura orgánika ba AMN tuir dekretu lei númeru 39/2020, 23 setembru, ba liña ministeriál hodi fó mós sira-nia hanoin, molok AMN hala’o knaar iha tinan ne’e.

Ministériu Defeza mós oferese ona fatin servisu foun ida ba AMN iha edifísiu Ministériu Defeza hodi utiliza provizória to’o sira hetan fatin servisu foun ne’ebé sei estabelese iha Komponente Navál Hera.

Ministru Filomeno hatutan, Governu sei prepara mós kondisaun hodi implementa projetu harii edifísiu Kompañia Navál nian rua iha fronteira Atabae-Bobonaro no Covalima.

“Autoridade Marítima preokupa liu mak liga ba infraestrutura tomak ba F-FDTL no Ministériu Defeza ne’ebé ita iha projetu sia (9) ne’ebé ita atu hala’o. Projetu haat iha liña ministeriál sira no projetu lima iha KAFI (Konsellu Administrasaun Fundu Infraetrutura) mak sei haree,” Filomeno ba jornalista, hafoin hala’o enkontru ho Prezidente Repúblika, Lú Olo, iha Palásiu Prezidente Nicolau Lobato, Bairru Pité, Dili, segunda ne’e.

Iha parte seluk, Ministru Filomeno haktuir, Governu no Komandu F-FDTL mós halo ona preparasaun hodi hein prosesu atu simu ró patrollamentu militár nian foun rua ne’ebé sei oferese hosi Governu Austrália iha tinan 2023.

Governu Austrália rasik daudaun ne’e fó apoiu hela hodi hadi’a kondisaun balun iha Portu Navál Hera hodi hein to’o prosesu simu ró foun ne’e.

Komandu Komponente Navál rasik haruka ona membru sira ba tuir treinamentu inklui formasaun iha Austrália hodi prepara halo operasaun bainhira ró ne’e to’o.

Antes ne’e, ekipa liña ministeriál sira ho Komandu F-FDTL diskute ona sei hili sira-nia reprezentante funsionáriu tékniku profisionál na’in rua hodi aprezenta ba AMN hodi halo preparasaun téknika ba ekipa ne’ebé sei hala’o servisu no simu pose iha tempu besik.

Grupu traballu sira ne’ebé tama iha ekipa AMN no Órgaun Sistema Autoridade Marítima mak hanesan, Komponente Forsa Navál Lijeria F-FDTL, Unidade Polísia Marítima UPM-PNTL, Polísia Sientífika Investigasaun Kriminál (PCIC-sigla Portugeza), Servisu Migrasaun, Diresaun Jerál Peska Arkikultura no Rekursu Mariñu, Diresaun Jerál Autoridade Aduaneira/Alfándega, Diresaun Jerál Autoridade Tributária.

Aleinde ne’e, envolve mós Diresaun Jerál Transporte Komunikasaun, Diresaun Jerál Protesaun Saúde, Administrasaun Portu Timor-Leste APORTIL,I.P, Diresaun Jerál Petróliu no Minerál, I.P, Diresaun Jerál Protesaun Sivíl, Ajénsia Investigasaun Fiskalizasaun Autoridade Ekonomia Sanitária no Alimentár AIFAESA, I.P, Diresaun Jerál Ministériu Justisa, Diresaun Jerál Ministériu Finansa, Diresaun Jerál Meiu Ambiente no Diresaun Jerál Turizmu.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here