Diretora Jerál Prestasaun Serbisu Saúde, Odete da Silva Viegas. Imajen Tatoli/Egas Cristovão

DILI,22 Janeiru 2020 (TATOLI)—Ministériu Saúde (MS) sei involve Arkedioseze Metropolitana Dili, iha programa prevensaun COVID-19.

Prosesu no mekanizmu involvimentu ne’e, ohin, Koordenadora Jerál Komisaun Nasionál Prevensaun COVID-19, Odete da Silva Viegas, ho ekipa introdús ona ba parte kúria Arkedioseze Metropolitana Dili, iha Paço Epíscopál, Lecidere.

Notísia Relevante:PR husu Governu sensibiliza sidadaun tuir regra hosi MS

“MS sei hatama Igreja Katólika iha serbisu pilár sira, atu halo diseminasaun informasaun  ba sarani sira. Ohin enkontru dahuluk, depois ekipa hosi parte Igreja sei la’o hamutuk ho ami hodi fó sensibilizasaun informasaun ba komunidade no sarani sira,” Odete da Silva Viegas hateten ba jornalista Agência Tatoli, iha Lecidere, sesta ne’e.

Odete esplika, parte Igreja sei hola parte atu fahe informasaun kona-bá prevensaun COVID-19, lihosi misa ne’ebé Padre sira selebra iha Igreja to’o Kapela sira.

“Iha ne’ebá klaru katak, sei halibur sarani barak. Entaun, Padre sira  bele aproveita fahe informasaun ba sarani sira no durante ne’e la’o hela, entaun ami suporta tebes,” nia subliña.

Involvimentu Igreja Katólika iha sensibilizasaun ho mekanizmu ida ne’e, Odete konsidera ajuda tebes Governu, liuliu Ministériu Saúde, tanba ema barak iha baze seidauk hatene kona-bá moras COVID-19.

Ho apoiu ida ne’e mós, haforte liu tan ekipa Minsitériu Saúde no importante liu mak komunidade rona  no halo tuir, atu nune’e ema hotu prevene aan hosi moras ne’e.

Tanba ne’e, durante enkontru, ekipa hosi MS halo aprezentasaun kona-bá pilár sira ne’ebé mak estabelese ona desde COVID-19 ne’e mosu iha marsu tinan 2020, to’o ohin loron. 

“Ami mós fahe informasaun kona-bá progressu no lala’ok moras COVID-19 iha ita-nia rain, ami mós fahe papél ida to’o sia kona-bá COVID-19 nian,’’ Koordenadora Jerál ne’e akresenta.

Iha okaziaun aprezentasaun ne’e, marka prezensa hosi Padre no Madre sira, grupu kategoriál sira ne’ebé koopera tebes ho parte ekipa prevensaun COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here