Logotipu UNTL

DILI, 21 janeiru 2021 (TATOLI)—Universidade Nasionál Timor Lorosa’e (UNTL), sei sosa tan kedeira ho modelu foun 10.000 ba sala-de-aula hamutuk 137, iha tinan ne’e.

Diretora Nasionál Lojístika no Manutensaun (DNLM), UNTL, Fátima Odete da Cruz Monteiro, hateten universidade sei sosa tan kadeira ho modelu foun, tanba antes ne’e uza modelu kadeira eskola ensinu sekundáriu nian.

“Ita sei sosa tan kadeira ho númeru ne’e atu hadi’a kualidade universidade nian. Tanba, kadeira sira ne’e universidade konsidera hanesan eskola ensinu sekundáriu nian. Entaun, ita hakarak troka fali ho modelu foun,” Fátima Odete da Cruz Monteiro  hateten ba jornalista Agência Tatoli iha kna’ar fatin, kampus Faspól Caicoli, kuarta ne’e.

Diretora ne’e esplika, totál sala-de-aula anteriór UNTL nian, hamutuk 101 no iha tinan ne’e sei aumenta tan 36 ne’ebé sei atinji to’o 137.

Sala-de-aula 36 ne’e, UNTL halo hela konstrusaun foun andár tolu, lokaliza hamutuk ho edifísiu  fakuldade Ekonomia no Fakuldade Sosiál Politika iha Caicoli, ne’ebé iha hela prosesu finalizasaun no sei konklui iha tempu badak.  

Nune’e mós pró-reitór UNTL asuntu akadémiku, Miguel Maia dos Santos, hateten atu sosa kadeira 10.000 ne’e, universidade prevee ona ninia orsamentu rasik hosi Orsamentu Jerál Estadu (OJE) 2021.  

“Ita iha osan sufisiente atu bele uza ba tinan tomak, inklui selu dívidas no sosa kadeira,” Miguel Maia dos Santos hateten.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here