Ministru Turizmu, Komérsiu no Indústria, José Lucas do Carmo da Silva. Imajen TATOLI/Egas Cristovão

DILI, 21 janeiru 2021 (TATOLI)–Ministru Turizmu, Komérsiu no Indústria (MTKI),  José Lucas do Carmo da Silva hateten parte MTKI hamutuk ho liña ministeriál sira seluk hahú halo diskusaun kona-ba partisipasaun Timor-Leste iha Expo Dubai 2021.

“Ohin, ita hala’o enkontru ida-ne’ebé ho nível diretór jerál sira, hosi liña ministeriál hotu-hotu mai iha-ne’e atu halo koordenasaun ne’ebé ke di’ak liután ba eventu Expo Dubai 2021,” José Lucas ba jornalista sira hafoin ramata hala’o enkontru, iha Sentru Konvensaun Dili (CCD-sigla Portugeza), kinta ne’e.

Nia esplika katak ne’e oportunidade  ne’ebé la’ós  atu promove de’it turizmu maibé haree mós kona-ba parte ekonomia,  parte infraestrutura,  edukasaun no saúde. Entaun, ministériu hotu-hotu ninia planu no ministériu hotu-hotu ninia prioridade sei aprezenta iha expo refere.

Tanba ne’e, tuir José Lucas, ministériu hotu-hotu  bele hahú halo preparasaun ne’ebé di’ak, liuliu tenke selesiona sira-ninia produtu ho planu ne’ebé ke hakarak atu integra iha promosaun ida-ne’e.

Governante ne’e dehan, lista produtu hosi Ministériu Turizmu, Komérsiu no Indústria aprovadu ona no iha produtu lubuk ida mak sei aprezenta iha Expo Dubai.

“Iha produtu 83  ne’ebé sai hanesan kategoria iha  Expo Dubai no  produtu 27 mak sei display, maibé  ita sei ko’alia ho ministériu sira atu oinsá sira bele prenxe ida-ne’e,” José Lucas tenik.

Prezidente Autoridade Expo Dubai ne’e hateten, kona-ba lista produtu ninian ne’e aprovadu maibé presiza loke diskusaun ba produtu ne’e rasik hosi tékniku liña ministeriál.

“Ita presiza haree kestaun tékniku sira. Produtu sira-ne’e tenke iha ninia sertifikadu orijen,” nia haklaken.

Iha fatin hanesan, Koordenadór Jerál Expo Dubai, Manuel Vong informa preparasaun Expo Dubai rasik prepara liuhusi faze rua. Iha faze 2020 konklui ona mak konsolidasaun, preparasaun no instalasaun ba ekipa traballu.

 Nia hatutan, faze daruak nian agora halo diskusaun atu ko’alia liubá iha produtu saida mak Timor-Leste atu bá promove iha Expo Dubai.

“Enkontru ida ohin ne’e túr hamutuk ho parte liña ministeriál atu diskute rekursu no produtu saida mak ita atu promove ba iha eventu Expo Dubai,” nia subliña.

Manuel hateten ninia ekipa sei dezloka bá iha munisípiu sira, atu  halo identifikasaun ba poténsia ne’ebé kada munisípiu iha liuhusi halo vídeo, nune’e bele lori bá Dubai halo promosaun.

Nia esplika, produtu sira ne’ebé atu halo komersializasaun no display ba iha Expo Dubai mak hanesan artezenatu, kafé, mina no sira seluk tan.

Entretantu, Expo Dubai  ofisialmete sei loke iha 01 outubru 2021 no taka iha 31 marsu 2022.

Jornalista: Natalino Costa

Editór: Xisto Freitas

HAKEREK NO HATÁN

Please enter your comment!
Please enter your name here