Prosesu aprendizajen iha Eskola 4 Setembru UNAMET Balide, Dili. Imajen/Dok. Espesiál

DILI,20 janeiru 2021 (TATOLI)—Ministériu Edukasaun Juventude no Desportu (MEJD) iha ona planu atu prodús lei hodi regula uniformizasaun farda nasionál ba estudante sira iha eskola hotu-hotu.

Ministru Edukasaun Juventude no Desportu, Armindo Maia, hateten polítika estabelesimentu lei ba regularizasaun farda iha 2021 ne’e, atu bele fasilita no fó apoiu di’ak liu tan ba eskola sira labele preokupa ho farda ba estudante sira kada tinan.

Notísia Relevante:PN husu MEJD hamosu Lei regula farda ba Ensinu Primária-Sekundária

“Tinan 2021 ne’e ita iha polítika ida atu diskuti kona-bá uniforme ba estudante sira, inklui kobransa sira. Rezultadu hosi diskusaun ne’e ita tenta prodús ba lei ida atu nune’e parte eskola sira bele la’o tuir,” Armindo Maia hateten ba jornalista sira iha Palásiu Governu, kuarta ne’e.

Governante ne’e rekoñese katak, durante ne’e eskola ida-idak deside rasik ninia uniforme, maibé ho planu Governu nian ne’e, Armindo iha esperansa estudante sira bele uza ona uniforme nasionál.

Kona-ba kestaun tékniku, ministru ne’e argumenta, ekipa elaboradór hosi SEJD sei diskute hodi haree mós ninia implikasaun finanseira.

“Ita presija haree implikasaun finanseira kona-bá presu farda atu desidi hamutuk. Ita sei tetu hamutuk atu prodús hotu ka atu haree uluk ba nível ensinu balun,” Armindo subliña.

Antes ne’e, reprezentante povu iha Parlamentu Nasionál husu ba MEJD atu hamosu duni lei ida ne’ebé bele define unifrome nasionál ba estudante sira, hahú hosi ensinu primária to’o sekundária.

Jornalista: Tomé Amado    

Editór: Cipriano Colo

HAKEREK NO HATÁN

Please enter your comment!
Please enter your name here