Ekipa Prevensaun COVID-19 iha fronteira Batugade dezinfekta pasajeiru 118 ne’ebé tama iha kuarta (20/01). Imajen/Facebook.

DILI,20 janeiru 2021 (TATOLI)— Governu autoriza pasajeiru na’in 118 ne’ebé mai hosi Atambua-Indonézia liuhosi fronteira Batugade, postu administrativu Balibo, munisípiu Bobonaro.

“Ita nia sidadaun sira ne’ebé mak ohin tama hosi fronteira Batugade hamutuk 118. Hosi númeru ne’e maioria estudante hamutuk ho diplomata balun no pasajeiru sira seluk,” Koordenadora Jerál Prevensaun COVID-19 Ministériu Saúde, Odete da Silva Viegas, hateten ba jornalista Agência Tatoli liuhosi telefónika, kuarta ne’e.

Koordenadora ne’e esplika, ekipa Ministériu Saúde serbisu hamutuk ho ministériu relevante sira hodi prepara kondisaun atu simu pasajeiru hirak ne’ebé tama hosi fronteira terrestre, bazeia ba protokolu prevensaun COVID-19.

Tuir planu, pasajeiru hirak ne’e sei kumpre kuarentena durante loron 14 iha otél lima ne’ebé mak Governu prepara ona.

“Ohin, Governu sei transporta pasajeiru hirak ne’e mai Dili atu submete ba kuarentena,” Odete informa.

Entretantu, otél lima (5) ne’ebé Governu prepara iha kapitál Dili ba pasajeiru na’in 118 ne’e mak hanesan, Novo Horizonte, Leokase, YQ Hotel, Villa Verde no Carla Mension.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here