Prezidente Comité Orientadora 25 Constâncio Pinto 'Terus'. Imajen Tatoli/Egas Cristovão

DILI,20 janeiru 2021 (TATOLI)— Tinan ne’e, Komité Orientadór 25 lidera hosi Constâncio Pinto ‘Terus’ sei prodús livru ualu (8) ho nia volume neen (6) ne’ebé ko’alia kona-bá istória luta ukun rasik aan Timor-Leste (TL) nian.

“Tinan ne’e nia laran ita sei esforsu atu prodús livru istória luta Timor nian, hamutuk livru ualu ho volume neen. Livru sira ne’e sei ko’alia barak liu kona-bá ita nia istória luta ba ukun rasik aan,” Constâncio Pinto hateten lia hirak ne’e ba jornalista sira iha salaun enkontru Ministériu Edukasaun Juventude no Desportu (MEJD) Vila Verde, kuarta ne’e.

Constâncio Pinto esplika, desde estabelesimentu Komité Orientadór 25 iha fulan fevereiru 2017, peskizadór timoroan na’in 12 ne’ebé espesifikadu iha área peskiza, hala’o ona sira nia peskiza hodi rekolla dadus istória luta Timor nian kuaze 1.500 iha rai laran no rai liur.

Tanba ne’e, nia hatutan, iha tinan ne’e Komité hetan apoiu orsamentu hosi Governu hamutuk rihun $400 atu kontinua hala’o atividade peskiza ba istória luta Timor nian, inklui sei halo mós produsaun ba livru ne’ebé prepara ona.

Eis vise Ministru Negósiu Estranjeiru no Kooperasaun ne’e afirma, ho Orsamentu Jerál Estadu (OJE) 2021 nian ne’ebé aloka ona ba Komité, sei ajusta ho didi’ak atu bele kontinua hala’o nafatin atividade peskiza no produsaun livru.

“Bainhira iha ajustamentu ne’e mak orsamentu la sufisiente, ita sei tenta halo fali proposta hodi husu tan apoiu orsamentu hosi Governu liu hosi MEJD atu atividade peskiza ne’e labele paradu,” nia subliña.

Entretantu, prezensa estrutura ho membru Komité Orientadór 25 iha MEJD atu atualiza serbisu ba ministru Armindo Maia, tanba antes ne’e Komité tutela ba Sekretáriu Estadu Juventude no Desportu (SEJD).

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here