Vise-Koordenadora Forsa-Tarefa ba Prevensaun no Metigasaun Surtu COVID-19 no atuál Diretora jerál Prestasaun Saúde-Ministériu Saúde, Odete da Silva Viegas. Imajen Tatoli/Egas Cristóvão

DILI,19 janeiru 2021 (TATOLI)— Ministériu Saúde (MS), liuhosi Komisaun Nasionál ba Prevensaun COVID-19 sei halo screening masál ba fatin públiku iha Dili laran, iha loron 25 janeiru tinan ne’e.

Koordenadora Jerál ba Komisaun Nasionál Prevensaun COVID-19, Ministériu Saúde, Odete da Silva Viegas, hateten ekipa serbisu finaliza ona esbosu no proposta kona-ba screening masál ne’ebé hato’o ona ba parte ministériu atu hetan aprovasaun.

“Proposta ne’e hato’o ona ba Ministra Saúde hodi hetan aprovasaun. Screening masál ne’e sei realiza iha loron 25 janeiru ba oin, ba fatin sira ne’ebé mak sei determina,” Odete da Silva Viegas hateten ba jornalista Ajénsia Tatoli iha kna’ar fatin, segunda ne’e.

Komisaun mós koordena ona ho parte Laboratóriu Nasionál  Saúde katak,  screening masál ne’e sei hala’o de’it ba ema na’in 250 kada loron, ne’ebé sei halo rotasaun ba fatin públiku, inklui edifísiu eskola Ensinu Superiór sira.

”Ha’u fó ezemplu karik loron ida sei foti de’it iha fatin ida ka rua hanesan iha Timor Plaza no aban tenke muda fali ba iha merkadu ida iha Dili laran. Númeru ne’ebé ami sei halo screening ho limitasaun, tanba ami presiza haree mós reazente sira hosi laboratóriu no mós kapasidade rekursu umanu,’’ Koordenadora Jerál COVID-19 Ministériu Saúde esplika.

Durante implementasaun, ekipa sei koordena ho Polísia Nasionál Timor-Leste  (PNTL) atu akompaña nafatin atividade ne’e iha fatin públiku, nune’e bele la’o ho di’ak.

”Ami tenki koordena ho PNTL no pilár lima atu halo swab ne’ebé kompostu hosi pilár tolu mak  atu haree ema, no pilár rua mak sei halo promosaun,’’ Odete da Silva Viegas esplika.

Odete  mós husu ba komunidade atu koopera ho komisaun, nune’e programa ne’e bele susesu tanba objetivu hosi screening ne’e rasik atu buka deteta transmisaun lokál COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here