Koordenadór pilár hitu COVID-19 Ministériu Saúde, Nilton do Carmo da Silva. Imajen Jogerjo Guterres

DILI,19 janeiru 2021 (TATOLI)—Ministériu Saúde (MS) re-integra pasiente COVID-19 na’in rua ba família, hafoin halo tratamentu iha sala izolamentu Vera Kruz.

“Ohin, tersa 19 janeiru 2021 Ministériu Saúde liuhosi biban ida-ne’e dekalara ba públiku katak, ekipa Saúde fó alta ona pasiente COVID-19 na’in rua ba ida-idak nia família, tanba livre ona hosi COVID-19,’’ Koordenadór pilár hitu COVID-19 Ministériu Saúde, Nilton do Carmo da Silva, informa liuhosi konferénsia imprensa iha salaun Ministériu Saúde, Caicoli.

Molok re-integra ba família, Nilton hateten, parte Ministériu husu sidadaun na’in rua ne’e atu halo nafatin kuarentena iha uma no kumpri medida preventiva tuir protokolu COVID-19 nian.

Médiku ne’e esplika, pasiente nai’n rua ne’e ida ema estranjeiru mane ho idade 33 no ida seluk Timoroan ho idade 42 ne’ebé baixa iha sentru izolamentu Vera Kruz iha loron 27 fulan dezembru 2020.

“Teste dahuluk hala’o iha loron 14 janeiru 2021, no teste daruak iha loron 18 janeiru 2021 ho rezultadu negativu. Nune’e, iha loron 19 janeiru Ministériu Saúde re-integra ba família,” nia subliña.

Istória viajen hosi sidadaun na’in rua ne’e mak hanesan, sidadaun estranjeiru ho idade 33 viajen hosi Pakistaun ba Doha-Malázia to’o iha Dili iha loron 22 fulan dezembru tinan 2020.

Alende ne’e, timoroan ho idade 42 hala’o viajen hosi UK ba Doha-Malázia to’o Dili iha loron 22 fulan dezembru 2020. 

Entretantu, dadus ba loron 19 janeiru 2021, komulativu teste 18.102, hein rezultadu  301, komulativu kazu 52, rekoperadu foun na’in rua,  rekoperadu 47 aumenta haat hamutuk 51, kazu foun laiha, atuál baixa na’in lima no rezultadu negativu 17.749.

Totál Kuarentena 106, Dili 28, Munisípiu 78, auto kuarentena 93, Dili 89, Munisípiu haat, pasa ona loron 14, 7.331, Dili 6.070, Munisípiu 1.261.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here