Formasaun portugés faze daruak ba órgaun komunikasaun sosiál, iha salaun PCM, Palásiu Governu, tersa (19/01). Imajen/Mídia SEKOMS

DILI, 19 janeiru 2021 (TATOLI)--Sentru Formasaun Téknika Komunikasaun (CEFTEC, sigla portugés) hamutuk ho Consultório da Língua Portuguesa (CLJ) realiza formasaun portugés iha faze daruak ba órgaun komunikasaun sosiál.

Biban ne’e, Sekretáriu Estadu Komunikasaun Sosiál, Merício Juvinal dos Reis ‘Akara’, konsidera lian hanesan valór kulturál no meiu komunikasaun hodi komunika ho ema seluk, tanba ne’e presiza dezenvolve ho di’ak.

“Lian ne’e importante atu transmite matenek no esperiénsia ne’ebé iha, tantu direta ka eskrita hodi reflete ba iha kapasidade bainhira halo relatóriu ka notísia ne’ebé di’ak,” Sekretáriu Estadu Akara, dehan iha salaun Prezidénsia Konsellu Ministru (PCM, sigla portugés), Palásiu Governu, tersa ne’e.

Governante ne’e nota katak formasaun ne’e hetan rezultadu di’ak, tanba ne’e nia husu formadór sira atu kontinua ritmu hanorin ho di’ak.

“Hanesan ha’u rona ona hosi Consultório da Língua Portuguesa, sira dehan progresu ne’ebé mak ita hetan durante ne’e di’ak, tanba sira ne’ebé mak tuir formasaun bele hakerek ona notísia iha Agência TATOLI, RTTL, GMN, Timor Post no média sira seluk. Hosi sira ne’e, 80% hakerek di’ak ona maibé presiza tan kompleta di’ak liután,” nia akresenta.

Nia subliña, CEFTEC tenke sai sentru ne’ebé exelente atu aproveita aprende no hakerek.

Iha fatin hanesan, Diretór Nasionál CEFTEC, Luís Evaristo dos Santos Soares, hateten hafoin partisipa formasaun, formandu sira iha ona koñesimentu klean, maneira hakerek notísia ho lian portugués ho kualidade tuir padraun jornalizmu.

“Husu ba dirijente mídia sira atu kopera no garante nafatin partisipasaun formandu sira iha períodu ida-ne’e no kontribui kualidade informasaun ba instituisaun mídia ida-idak rasik, liuliu utilizasaun lian portugués hanesan lian ofisiál Timór nian,” nia tenik.

Benefiáriu ba projetu CLJ desde hahú iha 2016 to’o dezembru 2019 hamutuk 190 no hosi númeru ne’e na’in-40 hanesan profisionál sira ne’ebé serbisu iha Governu no na’in-150 hanesan jornalista.

Enkuantu, jornalista sira ne’ebé iha ona melloramentu lian portugés hosi projetu CLJ iha 2016 to’o 2019 hamutuk 211 no profisionál hosi instituisaun Governu hamutuk 57.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here