Ekipa SEFOPE no UE foto hamutuk hafoin hala’o enkontru iha edifísiu Caicoli, segunda (18/01). Imajen/Mídia SEFOPE

DILI, 18 janeiru 2021 (TAOTLI)-Uniaun Europeia (UE) hatudu kompromisu apoia Governu liuhosi Sekretáriu Estadu Formasaun Profisionál no Empregu  (SEFOPE) hodi dezenvolve área formasaun profisionál atu hasa’e kapasidade no abilidade formadu hodi dezenvolve ekonomia Timor-Leste.

Kompromisu UE hato’o hosi Embaixadór UE ba Timor-Leste, Andrew Jacobs, bainhira hasoru Sekretáriu Estadu Formasaun Profisionál no Empregu, Alarico do Rosário.

“Ami ohin hasoru malu hodi koa’lia kona-ba oportunidade  atu  Uniaun Europeia apoia Governu Timor-Leste liuhosi SEFOPE, liuliu serbisu hamutuk iha kontestu formasaun profisionál,” Embaixadór Andrew Jacobs, hateten  hafoin enkontru, iha edifísiu SEFOPE, segunda ne’e.

Razaun UE hakarak apoia iha área formasaun profisionál tanba durante Embaixadór nota katak setór formasaun rekursu umanu impotante tebes ba dezenvolvimentu ekonomia rai-laran.

Iha biban hanesan, Sekretáriu Estadu  Alarico do Rosário, informa UE hakarak apoia SEFOPE hodi hasa’e kapasidade timor-oan sira.

“Embaixadór Uniaun Europeia sira haree liu ba oportunidade atu apoia área formasaun profisionál nian,” governante ne’e tenik.

Biban ne’e parte Sekretáriu Estadu aprezenta ona sentru formasaun iha Timór laran tomak no planu ne’ebé atu trasa iha formasaun profisionál.

Tanba ne’e, SEFOPE mós fó ona polítika no dadus ba sentru formasaun akreditadu sira hanesan Tibar no SENAI Becora ba parseiru Governu ne’e atu haree.

“Ami pronto koopera ho Uniaun Europeia iha área saida bainhira sira (UE) hakarak apoia ita,” Alarico akresenta.

UE hahú prepara program kona-ba kooperasaun foun ho Governu Timor-Leste ba períodu 2021 to’o 2027, ne’ebé maioria sei foku ba apoia setór pontesiál sira hodi dezenvolve ekonomia iha Timor-Leste.

Iha tinan ne’e, UE hato’o ona programa kooperasaun foun ba Governu Timor-Leste, ne’ebé sei aliña ba programa Governu atu dezenvolve rekuperasaun ekonómiku iha situasaun COVID-19.

Durante ne’e, UE apoia ona orsamentu millaun $110  ba Timor-Leste no iha loron 17 jullu, parseiru ne’e transfere ona orsamentu millaun $7,6 ba konta Governu Timor-Leste hodi integra ba Orsamentu Jerál Estadu (OJE) 2020, hodi finansia atividade prisipál tolu hanesan Jestaun Finansa Públiku, Nutrisaun no Desentralizasaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here