Sekretáriu Estadu Kooperativa, Elizário Ferreira, no Embaixadór Tailándia iha Timor-Leste, Ekapol Pollpipat, ko’alia kona-ba kooperasaun iha área kooperativa, iha edifísiu Akait, segunda (18/01). Imajen/Mídia SEKoop

DILI, 18 janeiru 2021 (TATOLI)–Sekretáriu  Estadu Kooperativa, Elizário Ferreira, konvoka enkontru kortezia ida ho Embaixadór Tailándia iha Dili, hodi ko’alia kona-ba kooperasaun iha área kooperativa kréditu uniaun.

“Ida-ne’e enkontru ho Governu Tailándia liuhosi ninia reprezentante iha Timor-Leste. Tanba ita atu dezenvolvimentu kooperativa, liuliu tanba iha kooperativa kréditu uniaun la’o di’ak tebes iha Tailándia, tanba ne’e ita presiza halo kooperasaun ho sira atu fó formasaun ba ita kona-ba oinsá atu dezenvolve kooperativa kréditu uniaun sira iha Timor-Leste,” Sekretáriu Estadu Elizário Ferreira, informa ba jornalista sira, hafoin enkotru iha edifísiu SEKoop iha Akait, segunda ne’e.

Formasaun ne’ebé maka Tailándia sei oferese sei realiza iha tempu badak.

“Tuir loloos koopesaun la’o ona iha loron 01 no 02 fevereiru, maibé iha oituan atrazu tanba situasaun COVID-19. Formasaun ne’ebé Governu Tailándia oferese ne’e iha área Kooperativa kreditu, ba ema na’in-30,” nia karesenta.

Iha fatin Embaixadór Tailándia iha Timor-Leste, Ekapol Pollpipat, hateten nia parte apresia ho enkontru ne’e no prontu ajuda SEKoop.

“Ami prontu ajuda fó formasaun iha área kooperativa no ami espera kooperasaun ne’e sei realiza iha tempu badak,” nia tenik.

Tuir diplomata Tailándia ne’e, formasaun ne’e sei realiza via online liuhosi Webinar.

Bazeia ba dekretu lei númeru 16/2004, iha tipu kooperativa 13 ne’ebé presiza estabelese iha Timor-Leste, maibé daudaun foin iha neen.

Ramu kooperativa ne’ebé iha hanesan kréditu uniaun ho totál 96 ho nia totál kapitál $6.125.496,56 husi membru hamutuk 12.679, kooperativa haat hetan apoia orsamentu husi subvensaun públika, enkuantu kooperativa seluk maioria halibur osan husi komunidade sira.

Multi sektorál hamutuk 52 ho totál kapitál $515.413,57 husi membru hamutuk 1.642, agrikultura iha 19 ho membru 368, ho totál kapitál $52.213, peska iha 15 ho membru 369, ho totál kapitál $24.122.

Nune’e mós, pekuária iha 3 ho membru 185, ho totál kapitál $982 no indústria iha neen, ho kapitál $17.899, ne’ebé halibur membru hamutuk 83.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here