Diretór Serbisu Saúde Munisípiu Bobonaro, João Baptista Mau Cardoso halo hela koordenasaun ho parte seguransa atu halo sensibilizasaun ba prevensaun COVID-19 iha fronteira Batugade, postu administrativu Balibo. Imajen Sentru Saúde Bobonaro.

DILI, 18 janeiru 2021 (TATOLI)— Ospitál referál Maliana kontinua implementa programa vizilánsia sentinela hodi halo swab rutina ba komunidade ne’ebé hela iha área fronteira no konsidera iha risku boot liu ba transmisaun COVID-19.

Diretór Serbisu Saúde Munisípiu Bobonaro, João Baptista Mau Cardoso, informa asuntu ne’e hafoin partisipa serimónia asina akordu entre Ministériu Saúde ho Uniaun Europeia no Organizasaun Mundiál Saúde ba projetu responde COVID-19 iha Timor-Leste, iha Palásiu Sinzas, Caicoli, segunda ne’e.

“Ami kontinua implementa programa vizilánsia sentinela, tanba kazu kontinua aumenta. Ami sempre halo swab ba komuniddae ne’ebé  iha risku ba COVID-19 hanesan Batugade, Badutme’an, Memo no Tunubibi. Ami foti sira-nia amostra no sira ne’e risku aas tebes, tanba kontaktu ho ema hosi liur,” João Baptista Mau Cardoso informa.

Hosi ema hirak ne’ebé profisionál saúde sira foti amostra, nia dehan, barak liu ospitál referál Maliana submete ba iha Laboratóriu Nasionál Saúde hodi halo teste, maibé rezultadu negativu hotu.

“Ita nia komunidade ne’ebé maihosi área fronteira hodi konsulta iha ospitál ne’e, ami sempre halo teste swab ba sira no foti sira nia amostra, maibé rezultadu negativu hotu,” diretór ne’e esplika.

Entretantu, Serbisu Saúde Munisípiu Bobonaro mós kontinua serbisu hamutuk ho parte seguransa no defeza hodi fó hanoin ba komunidade iha fronteira atu evita kontaktu illegál  ho maluk sira hosi Atambua-Indonézia.

Tuir dadus  hosi Serbisu Saúde Munisípiu Bobonaro  hatudu katak, númeru ema ne’ebé tama illegál iha fulan dezembru 2020 to’o ohin loron hamutuk na’in 19 no submete ba kuarentena ne’ebé Governu estabelese iha Batugade.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here