Segundu Komandante PNTL Munisípiu Dili, Superintendente Euclides Belo. Imajen Tatoli/Eugénio Pereira

DILI, 18 janeiru 2021 (TATOLI)- Komandu Polísia Munisípiu Dili, foin lalais ne’e, halo vizita solidariedade hodi espresa sira nia domin ba haree direita kondisaun saúde membru polísia sira ne’ebé sofre moras iha ida-idak nia uma.

Segundu Komandante PNTL Munisípiu Dili, Superintendente Euclides Belo, hateten vizita ne’e importante hodi transmite mós mensajen Komandante Jerál PNTL, Komisáriu Faustino da Costa, hodi konsola membru sira ne’ebé sofre moras labele lakon esperansa, maibé husu sira reza maka’as no deskansa hodi bele rekupera sira nia saúde.

Vizita ne’e akompaña mós hosi ekipa médiku PNTL nian hodi halo tratamentu saúde ba membru sira.

“Vizita ne’e atu haree direita ami nia membru sira ne’ebé tinan barak ami servisu hamutuk, balun sofre moras tenke hela iha uma, tanba ne’e ami ba vizita para espera ami nia domin ba sira,” informa Superintendente Euclides Belo, ba jornalista, ohin, iha Komandu PNTL, Caicoli, Dili.

Daudaun ne’e membru PNTL Dili na’in-lima maka sofre moras kompostu hosi polísia feminina na’in-ida ho mane  na’in-haat sofre moras.

Komandu PNTL rasik hasai ona orden hodi husu ba membru PNTL hotu-hotu sente sofre moras bele halo tratamentu saúde gratuita iha Klínika Komandu Jerál PNTL iha Caicoli Dili no ospitál nasionál ka klínika privadu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here