Deputadu sira hosi bankada parlamentár Frente Revolusionária Timor-Leste Independente (FRETILIN), hala'o fiskalizasaun surpreza ba distribuisaun cesta bázika iha Supermerkadu Vila Verde. Imajen TATOLI/Evaristo Soares Martins.

DILI, 15 janeiru 2021 (TATOLI)–Deputadu sira hosi bankada parlamentár Frente Revolusionária Timor-Leste Independente (FRETILIN), hala’o fiskalizasaun surpreza ba distribuisaun cesta bázika iha Supermerkadu Vila Verde hodi identifika kompañia fahe sasán saudavél no kualidade ba populasaun iha suku Vila Verde.

Deputadu sira-ne’ebé vizita surpreza mak hanesan Xefe Bankada FRETILIN, Deputadu Francisco Miranda Branco, Antoninho Bianco, Mariano Fatubai Mota, Alexandrino Cardoso da Cruz no deputada Maria Anabela Sávio.

Reprezentante Bankada Governu, Deputadu Antoninho Bianco fundamenta, sasán ne’ebé prepara hosi supermerkadu saudável no kualidade tanba konserva iha zalera iha loja laran ho di’ak tebes.

Deputadu bankada FRETILIN ne’e hateten, vizita surpreza hodi buka hatene sasán sira-ne’ebé ne’e dehan laiha kualidade no la saudável.

“Folin sasán hotu ne’ebé kompañia oferese ba komunidade sira, tuir duni presu normál iha merkadu no sasán sira nia folin to’o duni $50 ba fulan rua nian kada membru ha família ida. Ohin, ami buka atu tenta haree rasik, ba haree presu ne’e, presu fós ne’ebé ke atu fahe, presu batar ne’ebé atu fahe, presu koto ne’ebé atu fahe depois na’an manu ne’ebé ke atu fahe, masin-midar ne’e, ami iha tabela ne’e ami check, sira tau presu hotu. Entaun, hosi presu ne’ebé ke iha, item sira fó ne’e soma hamutuk $50,” nia ko’alia iha Supermerkadu Vila Verde, kinta ne’e.

Nia dehan, sasán hirak ne’ebé tau iha loja laran maiória di’ak hotu, iha na’an karau ne’ebé di’ak, na’an manu ne’ebé saudável, iha koto di’ak, fore-mungu, inklui mós fós sira hosi munisípiu Ainaro nian.

“Kondisaun di’ak, tanba ema-nia loja ne’e iha kondisaun para atu-bele tau sasán hodi ema hotu sosa, ne’ebé kompañia ne’e loja aluga fatin ne’e hodi distribui sasán cesta bázika ba populasaun sira hotu. Razaun atu dehan katak situasaun reál ne’e halo nusá, tanba ema balu ko’alia oioin, deputadu balu ko’alia, entaun ami mai justifika took mekanizmu ne’e halo nusa. Ezemplu ema forma halo nusá, sé mak iha laran, xefe Suku, ema-nia komunitária ne’e akompaña sira-nia populasaun, iha ema ONG sira, iha ema reprezentante hosi KAK, sira hotu iha-ne’e akompaña sasán,” nia dehan. 

Xefe Aldeia Virgolosa, Suku Vila Verde, Feliciana Íria Soares, hateten benefisiáriu hosi aldeia refere hamutuk 287.

“Presu sasán ne’ebé oferese hosi loja bazea ba estandarte normál katak sasán ne’ebé ami rasik hili, ami sura hamutuk dollar $50,” esplika Xefe Aldeia Virgolosa.

Suku Vila Verde ne’ebé lokaliza iha Postu Administrativu Vera Cruz ne’e kompostu hosi aldeia sia (9), aldeia 1 Setembru, Matua, Lemorai, Terus Na’in, Mate Moris, Mate Restu, Nopen, Gideon no Virgolosa.

Aldeia ne’ebé simu ona sasán cesta bázika ne’e mak hanesan Mate Restu, Gideon, Nopen no oras ne’e tama ona aldeia Virgolosa.

Deputadu sira hosi bankada parlamentár Frente Revolusionária Timor-Leste Independente (FRETILIN), hala’o fiskalizasaun surpreza ba distribuisaun cesta bázika iha Supermerkadu Vila Verde. Imajen TATOLI/Evaristo Soares Martins.

Tuir lista sasán cesta bázika ne’ebé Agência TATOLI, ne’ebé asesu hosi Loja 8 Supermerkadu Vila Vila Verde kompostu hosi fos kilógrama 1 ho osan $8.75, batar-uut kilógrama 2 ho osan $3.50, fore-mean kilógrama 1 ho osan $2.75, fore-keli kilógrama 2 ho osan $5.50, fore-mungu kilógrama 1 ho osan $2.75, minyak goreng $1, kafé expesso $3.70, masin $0,40, susu-been enak $1.70, masin-midar kilógrama 1 ho osan $0.65, ayam potong Timor kilógrama 1 ho osan $11.50.

Nune’e mós na’an-karau kilógrama ho osan $11.50, manutolun $2, modo mutin no modo metan $5, repollu $2.50, capcai $2.50, modo funan $2.50, koto nurak $2.50, chayote $2.50, eggplant $2.50.

Nune’e mós cabbage $2.50, carrot $2.50, ainanas $2.50, alfase $2.50, lis-mutin $1.25, ai-lia $1.25, aimanas-kiik $1.25, lis-mean $1.25, sabaun-morin $0,30, pepsodent $0,70, iskoba kose-nehan $0,75, hand sanitizer $0,50 no rinso $1.75.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here