Fronteira terrestre Batugade. Imajen TATOLI/António Gonçalves.

DILI, 14 janeiru 2021 (TATOLI)- Timoroan na’in-56 daudaun ne’e hela provizóriu iha Konsuladu Timor-Leste iha Atambua-Indonézia.

Abitante sira ne’e hela iha Konsuladu Atambua hahú kedas iha loron 24 dezembru 2020 to’o agora labele hala’o viajen mai Timor-Leste, tanba fronteira taka.

Portavós Estudante Timoroan, António O.M da Cunha, liuhosi mensajen WhatsApp ba Agência Tatoli husu ba Governu Timor-Leste atu bele loke fronteira hodi sira bele tama Timor-Leste.

“Ami estudante Timoroan ne’ebé mai hosi fatin estudu la hanesan agora daudaun hela iha Konsuladu Timor-Leste iha Atambua hamutuk na’in-56, inklui labarik ho bebé balu,” António hateten.

Portavós ne’e hato’o agradese ba laran-luak hosi Konsuladu Timor-Leste ba Kupang, Jesuíno dos Reis Matos “Zito” ho Konsuladu Timor-Leste ba Atambua, João Simão Sousa ho ekipa protokolu ne’ebé hatudu domin hodi fó fatin ba sira hela provizóriu iha konsuladu to’o fronteira loke foin tama ba TL.

Estudante hirak ne’e mós husu ba Estadu Timor-Leste bele loke ona fronteira hodi sira bele tama Timor-Leste, tanba estudante balun hahú menus osan inklui problema dokumentu.

Besik fulan ida ona, estudante sira ne’e hela iha Atambua no hasoru problema oin-oin hanesan:

  1. Visa pasaporte balun besik inválidu ona, visa estudante prazu liu ona no hetan Exit      Permite Only (EPO) hosi Autoridade Migrasaun Indonézia.
  2. Impedimentu ba estudante finalista ne’ebé halo estájiu iha Timor-Leste.
  3. Finansia ba estudante idak-idak nia moris osan menus atu sustenta sira-nia          nesesidade báziku durante hela iha Konsuladu Atambua.

Ho problema hirak ne’e hotu, Estudante sira husu ba Estadu Timor-Leste atu loke fronteira hodi sira bele tama mai hodi kumpre regra Ministériu Saúde hodi hela iha kualkér fatin kuarentena ne’ebé Governu prepara ona.

Agência Tatoli konfirma asuntu ne’e ho Konsuladu Timor-Leste ba Kupang, Jesuíno dos Reis Matos “Zito via mensajen Facebook, deklara problema ne’ebé estudante sira enfrenta, Konsuladu Atambua koopera hodi buka rezolve.

Migrasaun la fó autorizasaun

Diretór Jerál Servisu Migrasaun, Superintendente Asistente Polísia, Luis Barreto. Imajen Tatoli/Eugénio Pereira

Iha parte seluk, Diretór Jerál Servisu Migrasaun, Superintendente Asistente Polísia, Luis Barreto, husu ba abitante Timoroan na’in-56 atu hein to’o fronteira terrestre loke maka sira bele hala’o viajen tama Timor-Leste.

Diretór Luis dehan, Estadu Timor-Leste implementa hela Estadu Emerjénsia (EE) dasiak hahú ne’ebé renova abranje ba territóriu nasionál tomak hahú vigora hosi tuku 00:00 loron 3 fulan Janeiru tinan 2021 too tukun 23:59 loron 1 Fevereiru 2021.

 “Agora daudaun fronteira taka to’o loron 1 fevereiru 2021, tanba seidauk iha orientasaun loke fronteira ba oráriu atu ema tama sai,” dehan Superintendente Asistente Polísia, Luis Barreto ba jornalista, ohin, iha Servisu Migrasaun Vila-Verde Dili.

Nia hatutan, durante fronteira taka, Migrasaun servisu hamutuk ho Unidade Patrullamentu Fronteira (UPF) no Komandu FALINTIL-Forsa Defeza Timor-Leste (F-FDTL) la autoriza kualkér sidadaun atu hakat tama mai territóriu TL tantu legal no ilegál.

“Ami koopera ho UPF no F-FDTL kontrola movimentu fronteira la iha ema tama sai,” nia alerta.

Ba sidadaun sira ne’ebé tenta hakat tama ilegál, autoridade seguransa sei kaptura no entrega ba Ministériu Saúde hodi haruka sira hela iha kuarentena remata no Migrasaun sei prosesa ema hirak ne’e tuir lei.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here