Administradór Munisípiu Viqueque Januario Soares “Boly”. Imajen/Espesiál.

DILI, 14 janeiru 2021 (TATOLI)—Ministru Administrasaun Estatál (MAE), Miguel Pereira de Carvalho, enkoraja Administradór Munisípiu Viqueque Januario Soares “Boly” atu mantein pozisaun hanesan lideransa di’’ak no sai lider ba nia povu rasik.

“Ha’u enkoraja atu Administradór foun Munisípiu Viqueque, Autoridade Lokál no lideransa komunitária sira atu mantein imi-nia pozisaun hanesan líder. Katak, maske servisu sira-ne’ebé ita-boot sira hala’o ne’e todan no ejijente, maibé ita-boot sira bele konta ho apoiu Governu sentrál nian,” Miguel Perreira de Carvalho hateten liuhosi ninia diskursu hodi reprezenta Xefe Governu iha serimónia tomada de pose ba administradór foun ne’ebé Agência TATOLI asesu, kinta ne’e.

Ministru ne’e hatutan, labele haluha koopera ho parte hirak ne’ebé hakarak kontribui no apoiu ho sira-nia dedikasaun no profisionalizmu, liuliu funsionáriu públiku, xefe no dirijente sira iha Munisípiu Viqueque ne’ebé prontu atu tulun bainhira presiza atu kumpre misaun to’o mandatu ramata.

Tanba ne’e, nia dehan, presiza servisu hamutuk ho ema hotu, valoriza malu, kumpre kódigu étika funsionalizmu públiku, kumpre dever no responsabilidade hanesan traballadór Estadu nian no importante tebes hodi garante susesu ba mandatu dirijente ida-nian.

“Ohin, Administradór Munisípiu Viqueque simu ona pose. Ha’u hakarak dezafia komponente hotu iha Munisípiu Viqueque ho lideransa Administradór foun Munisípiu Viqueque nian, hodi implementa prinsípiu governasaun di’ak nian iha atuasaun Administrasaun Lokál Estadu iha Munisípiu Viqueque,” nia hateten.

Governante ne’e haktuir, governasaun di’ak katak prosesu kona-ba foti ka halo desizaun no implementasaun ba polítika no atividade sira ho maneira ida-ne’ebé efetiva, efisiente, lejítima no justa liután.

Boa governasaun, nia esplika, tenke assegura atu prosesu governasaun prenxe duni nesesidade povu Timor-Leste nian no promove sira-nia direitu. Tansá boa governasaun ne’e importante, nia eehan, rekursu hotu-hotu ne’ebé Estadu uza pertense hanesan ba sidadaun hotu-hotu Timor-Leste nian, entaun Estadu tenke uza nia rekursu atu benefisía ema hotu iha Timor-Leste.

“Ho ne’e, ha’u laran metin katak ho matenek no esperiénsia ne’ebé iha, Administradór foun Munisípiu Viqueque nian, bele konta ho apoiu hosi populasasun Munisípiu Viqueque nian, inklui apoiu mós hosi lideransa komunitáriu sira, no mós komponente hotu iha Viqueque hodi dezenvolve Munisípiu Viqueque sai di’ak liu ihab future,” Governante ne’e dehan.

Aleinde ida-ne’e, nia hato’o deseju ida nakonu ho naroman nafatin iha fatin seluk ne’ebé administradór sesante sei ho vontade di’ak hakarak hakanar-aan bá, no hakarak kontinua fó kontribuisaun ba dezenvolvimentu munisipál no nasionál.

“Ita-nia Administradór Munisípiu Viqueque sesante, Gregório Henrique, ne’ebé ramata ona ninia knaar ho di’ak. Hau, pessoalmente, no ami hotu ne’ebé halibur iha fatin ida-ne’e no VIII Governu Konstitusionál nian naran, ha’u hato’o agradese profundu ba Administradór sesante, ba ita-boot nia kontribuisaun durante tinan naruk iha servisu administrasaun munisipál Viqueque nian,” nia dehan.

Jornalista : Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here