Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo. Imajen Tatoli/Eugénio Pereira

DILI, 14 janeiru 2021 (TATOLI)- Labarik ida mate no ema na’in-sia (9) evakua urjente ba halo tratamentu intensivu iha ospitál Munisípiu Lautem hafoin konsumu ikan tasi ne’ebé sira rasik ba peska.

Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo, relata vítima ida ne’ebé mate ho naran Leonel Fernandes, tinan sia (9) bainhira ho família hamutuk konsumu ikan ne’ebé sira rasik mak ba peska iha tasi.

Kazu ne’e akontese iha tersa (12/01), tuku 13:00 Otl, iha Suku Parlamentu, Postu Administrativu Lautem, Munisípiu Lautem.

“Tuir relatóriu, família sira-ne’e konsumu hela ikan, depois maka ikan lanu vítima ida mate no na’in-sia ne’ebé lanu lori halai kedas ba ospitál,” informa  Arnaldo  de Araújo ba jornalista, ohin, iha Komandu Jerál PNTL, Dili.

PNTL hamutuk ho ekipa médiku Lautem sei halo nafatin investigasaun ba modelu ikan ne’ebé família ne’e konsumu hodi rezulta vítima Leonel mate.

“Polísia deskonfia sira konsumu ikan ne’ebé kontein ho venenu iha laran,” Arnaldo de Araújo hateten.

Iha akontesimentu ne’e, parte PNTL ho ekipa médiku to’o kedas fatin akontesimentu hodi rekolla evidénsia no foti deklarasaun hosi sasin sira.

Daudaun ne’e vítima na’in -sia akompaña hosi família sei kontinua hala’o tratamentu intensivu iha ospitál Lautem no autoridade polísia mós entrega ona mate-isin ba parte família hodi hala’o serimónia funerál.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here