Diretór Jerál Servisu Migrasaun, Superintendente Asistente Polísia, Luis Barreto. Imajen Tatoli/Eugénio Pereira

DILI, 14 janeiru 2021 (TATOLI)- Ministériu Interiór liuhosi Diresaun Nasionál Servisu Migrasaun (DNSM) durante tinan tomak 2020, halibur osan $1,094,290.00 hodi hatama ba kofre Estadu.

Diretór Jerál Servisu Migrasaun Superintendente Asistente Polísia, Luis Barreto dehan, reseita ne’e rekolla hosi Postu Integradu Batugade, Mota Masin Covalima, Satako, Wesilo- Oe-cusse, Aeroportu Internasionál Prezidente Nicolau Lobato Comoro, Portu Dili no Servisu Migrasaun Vila-Verde, Dili.

“Reseita ne’ebé Migrasaun kobra iha tinan 2020 ne’e hamutuk $1,094,290.00 ne’ebé rekolla iha postu integradu sira ne’ebé eziste,” informa Superintendente Asistente, Luis Barreto ba jornalista, ohin, iha nia servisu fatin, Edifísiu  Migrasaun, Vila-Verde, Dili.

Migrasaun konsidera tinan 2020 reseita ne’ebé hatama ba kofre Estadu ki’ik liu, tanba Timor-Leste inklui mundu tomak luta prevene ameasa surtu COVID-19, tanba ne’e fronteira terrestre, tasi no Aeroportu taka durante Estadu Emerjénsia (EE) dahuluk to’o dasiak ne’e.

Tuir dadus estatístika Migrasaun halo komparasaun ba fulan ualu (Janeiru to’o Agostu) 2019, konsege hatama reseita ba kofre Estadu hamutuk $3,9785.

Osan ne’e rekolla ladún boot, tanba iha fulan setembru 2019 liubá to’o agora, Governu Timor-Leste aplika ona livre vistu ba sidadaun Indonézia no Sidadaun nasaun Europeia kompostu nasaun 20.

Durante tinan 2020, Migrasaun mós halo atendimentu ba sidadaun sira ne’ebé ba trata vistu turista, traballu, estadia temporáriu, no vistu autorizasaun rezidénsia hamutuk ema na’in-9,748.

Hafoin Estadu Timor-Leste deside implementasaun Estadu Emerjénsia dahuluk iha tinan 2020 to’o dasiak 2021, konsege halo mós atendimentu ba sidadaun estranjeiru sira-nia vistu hamutuk ema na’in-7,218.

Ema na’in 52,292 tama Timor-Leste

Servisu Migrasaun mós rejista durante tinan 2020, abitante Timoroan no estranjeiru hamutuk ema na’in-52,392 maka halo movimentu tama Timor-Leste, no ba movimentu ema sai hosi Timor-Leste ba rai-li’ur hamutuk 51,634.

Ema hirak ne’ebé halo movimentu tama-sai Timor-Leste mai hosi abitante hosi nasaun oin-oin, inklui Timoroan sira.

Ba sidadaun sira ne’ebé tama ilegál, Migrasaun aplika Lei  Migrasaun Nú.11/2071  selu koima ba Estadu Timor-Leste ho montante $30,00

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here