Ferik Idozu (terseira idade) sira forma no tuur hein hela iha Banku hodi simu pagamentu husi governu liu husi Banku Nasional Comersiu Timor Leste, Dili. Imajen TATOLI/Antonio Goncalves.

DILI, 13 janeiru 2021 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, informa pagamentu faze daruak ba idozu sira seidauk finaliza no agora daudaun la’o hela, maske pagamentu ne’e hahú hala’o ona iha dezembru 2020.

Notísia Relevcante: INSS haruka ona naran idozu 728 ba BNCTL

“Ita halo pagamentu ba idosu sira hahú iha 09 dezembru 2020 no tuir ita-nia planu hakarak pagamentu hotu iha janeiru tinan ne’e nia-laran. Maibé, depende iha terrenu tanba implementadór mak Banku Nasionál Timor-Leste (BNCTL). No tempu hanesan mós BNCTL halo pagamentu ba programa bolsa da mãe, tan ne’e mak sei tarde uitoan no pagamentu faze daruak ba idosu sira to’o agora seidauk finaliza,” Longuinhos Armando Leite informa ba Agência TATOLI iha nia knaar Ministériu Solidariedade Sosiál no Inkluzaun, kuarta ne’e

Longuinhos hatutan, maiória idozu sira barak mak simu ona subsídiu ne’e no hein katak tempu badak pagamentu ne’e finaliza tanba nia parte orienta hela tékniku sira atu konsulta ho banku no bele aselera lalais proseu pagamentu refere.

“Maiória mak ita selu hotu ona. Ha’u hanoin, suku balun fora hosi Dili nian mak ita kontinua nafatin la’o hela. Maibé, idozu maiória mak ita selu hotu ona. Ho ida-ne’e, ha’u mós kontinua orienta ha’u-nia tékniku sira atu konsulta ho banku atu bele aselera lalais pagamentu ne’e,” nia dehan.

Tuir nia, hosi totál idozu hamutuk rihun 97 ho osan millaun $16 ne’e, nia parte seidauk hatene katak hira mak selu ona no seidauk ne’e tanba sei hein pagamentu finaliza tiha mak hafoin fó sai dala ida.

Aleinde ida ne’e, nia dehan, iha mós faze daruak ba pagamentu audisionál nian ba idozu ne’ebé lasimu osan iha faze dahuluk nian.

“Parte seluk ita mós selu ferik-katuas ne’ebé iha faze dahuluk la simu osan. Tanba, razaun dehan moras no lia kona sira. Entaun, sira-ne’e ita konklui hotu ba faze daruak nian hodi simu dala rua nian ba faze dahuluk no faze daruak tinan 2020 nian,” nia hateten.

Pagamentu ne’e finaliza tarde uitoan, nia dehan, tanba tempu udan entaun susar ba ferik-katuas sira atu hakbesik aan ba sede suku.

“Ita-nia pagamentu idozu ba faze daruak nian akontese iha tempu udan entaun difikulta servisu ekipa pagamentu nian no mós tanba dala ruma rede internete mós laiha. Ho buat hirak ne’e hotu mak halo pagamentu ne’e labele aselera,” nia dehan.

Jornalista: Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here