Ministru Ensinu Superiór, Siénsia no Kultura, Longuinhos dos Santos. Imajen TATOLI/Egas Cristovão

DILI, 13 janeiru 2021 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, hateten haruka ona karta sirkulár ba Instituisaun Ensinu Superiór Públiku no Privadu (IESPP) atu labele hala’o serimonia graduasaun ba estudante finalista sira nune’e bele kontribui ba prevensaun surtu COVID-19.

“Horisehik ha’u reforsa tan sirkulár ida ba IESPP sira ne’ebé eziste, informa ba instituisaun sira katak, atividade ne’ebé bele hala’o no ida ne’ebé mak labele hala’o. Atividade sira ne’ebé proibidu mak serimónia yudisium no graduasaun, nune’e bele prevene ema labele liu na’in 10,” Governante ne’e informa ba jornalista sira iha Palacio Governo, kuarta ne’e.

Notísia Relevante :Estudante UNTL 568 prepara ba graduasaun

Membru Governu Konstitusionál daualu ne’e reforsa bainhira IESPP sira la kumpre sirkulár ida ne’e, sei hetan sansaun husi Governu.

“Husu atu kumpre ho didi’ak hodi nune’e labele hamosu dezentendimentu iha parte implementasaun,” nia hateten.

Nia dehan, mezmu la autoriza hala’o graduasaun, maibé prosesu aprendizajen la’o normal.

“Lei fó dalan ba IESPP atu la hapara sira-nia atividade ensinu aprendizajen maibé iha atividade akadémiku nian, ne’e mak presiza hetan kontrolu másimu hosi Ministériu tuir depaixu konjuntu entre MESSK ho Ministériu Saúde atu hotu-hotu bele kumpre regra protokólu COVID-19,” Governante hateten.

Notísia Relevante :Iha posibilidade UNTL adia graduasaun ba estudante finalista

Jornalista :Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here