Reprezentante hosi MAP, UE no, Embaixada Portugál iha Timor-Leste, kuda ai-kameli iha munisípiu Aileu. Imajen/Camões,IP

DILI, 13 janeiru  2021  (TATOLI)–Minitériu Agrikultufra no Peska (MAP) hamutuk ho Uniaun Europeia (UE) no Governu Alemaña selebra loron nasionál ai-kameli no floresta hodi distribui ai-oan 70.000 ba projetu ‘Ai ba Futuru’ hodi bele kuda.

Tuir nota ne’ebé Agência TATOLI asesu, esplika katak iha seleberasaun ne’e hahú distribuisaun ai-oan, ne’ebé prodús iha viveiru hosi Quinta Portugal iha Aileu no mós iha viveiru famíliar hamutuk 7 ne’ebé hetan apoiu tékniku no materiál husi Projetu Quinta Portugal, ne’ebé atu fahe ba benefisiáriu hosi projetu Ai ba Futuru.

Iha selebrasaun ne’e, ekipa sira kuda ai-kameli oan no kafé arábika oan iha Sentru Agroflorestál Quinta Portugal.

Atividade ne’e, ho objetivu atu selebra loron nasionál ba ai-kameli no floresta, ne’ebé dekreta hosi Governu Timor-Leste iha tinan 2017, hanesan maneira hodi reforsa papél krusiál hosi floresta iha ámbitu kombate ba mudansa klimátika, iha konservasaun ba biodiversidade no iha dezenvolvimentu ekonomia.

Governu ho kolaborasaun hosi Estadu membru UE asegura apoiu ba komunidade rurál sira, atu valoriza no diversifika floresta no plantasaun nasionál sira.

Quinta Portugal no GIZ estabelese kooperasaun ba  períodu 2019 to’o 2022 atu prodús no distribui liu ai-oan 200.000 husi espésie agroflorestál oin-oin ne’ebé destina ba benefisiáriu rojetu Ai Ba Futuru iha munisípiu Manatuto, Baucau, Viqueque no Lautém.

Projetu Quinta Portugal, lokaliza iha Sentru Agroflorestál hosi Quinta Portugal iha munisípiu Aileu, postu administrativu Aileu Vila, suku Seloi Malere, aldeia Hularema, ho objetivu atu kontribui ba hadi’a seguransa ai-han nasionál, liuhosi aumenta fonte rendimentu komunidade rurál, diversifika produsaun agroflorestál no liuhosi haforsa ligasaun ba merkadu ho promosaun ba prátika téknika konservasaun no jestaun sustentável rekursu naturál sira.

Tuir Embaixadór UE iha Timor-Leste, Andrew Jacobs, UE preokupa atu hadi’a meiu ambiente no proteje floresta sira, tanba ne’e apresia ho kooperasaun serbisu ne’e.

“Ami orgullu serbisu hamutuk ho Governu Timor-Leste ne’ebé fahe ami-nia preokupasaun kona-ba mundu ida matak liu. Ai ba Futuru fó apoiu ba joven empresáriu ne’ebé hela iha área rurál no tulun ba komunidade hasoru konstranjimentu ekonómiku ne’ebé mosu ho pandemia,” Andrew Jacobs dehan.

Ai ba Futuru (Partnership for Sustainable Agroforestry – PSAF), hanesan projetu ne’ebé ko-finansia hosi EU no MAP, ne’ebé dezenvolve hosi Alemaña.

Projetu tinan lima ne’e nia alvu maka família vulnerável sira iha aldeia 40, ne’ebé selesiona iha munisípiu haat iha objetivu atu kuda ai-oan millaun 3.

Partisipante sira iha eventu ne’e maka Diretór Nasionál Komunidade Floresta hosi MAP Mario Godinho, Adida ba Kooperasaun hosi Embaixada Portugal iha Timor-Leste Cristina Faustino, Diretór Servisu Munisipál Agrikultura hosi Aileu, no reprezentante sira husi GIZ no Instituto Camões, IP. 

Entertantu, Totál partisipante sira sei limita ba ema na’in-10 atu kumpre medida prevensaun pandemia COVID-19, ne’ebé Governu estabelese iha Estadu Emerjénsia da-siak.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here