Komandante Jerál PNTL Komisariu Faustino da Costa, konverse hela ho Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/Antonio Gonçalves

DILI, 13 janeiru 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hakarak Komisáriu Polísia Faustino da Costa, kontinua lidera instituisaun  Polísia Nasionál Timor-Leste (PNTL).

“Se ezonera komandante jerál tenke hatene tanba saida maka ezonera. Labele ezonera arbiru de’it, ha’u la aseita ida-ne’e”, afirma Lere Anan Timor hodi responde Agência Tatoli iha Palásiu Prezidensiál, Dili.

Lere rasik rona ona informasaun atu ezonera Komisáriu Polísia Faustino da Costa, hosi entidade sira iha Governu, maibé Jenerál Lere  iha nia rezerva balun hodi dehan, vise-Ministru Interior, António Armindo, la iha kompeténsia atu ezonera Komisáriu Faustino da Costa.

“Vise-Ministru Interiór mak ko’alia dehan atu ezonera, Vise ministru interiór la iha kompeténsia ida”, afirma Jenerál Lere Anan Timur.

Veteranu rezisténsia ne’e mós rejeita informasaun kona-ba baze ezonera Komisáriu Faustino hosi PNTL  tanba atu nomeia  fila fali veteranu rezisténsia balun hosi Instituisaun F-FDTL.

“Informasaun ne’e laloos,” afirma Lere Anan Timur hodi lia tun tan, “veteranu sira mós ami katuas ona, ami hakarak deskansa, fó oportunidade ba joven sira atu ukun”.

Lere hatutan, veteranu rezisténsia sira ne’ebé agora asume knaar Komandante F-FDTL hanesan, Vise Xefe Estadu Maiór Jenerál F-FDTL, Brigadeiru Jenerál Falur Rate Laek, Brigadeiru Jenerál Cornelio Ximenes “Mau Nana”, Brigadeiru Jenerál, Koronél Calisto Santos Coli “Coliati” no komandante seluk tan idade avansa ona tenke deskansa akompaña nafatin dezenvolvimentu F-FDTL no PNTL la’o hamutuk.

“Ba duni ema sai ne’e fasil, mais ó atu transforma ema sai komandante ne’e mak difisil, mais Faustino da Costa, timoroan no lider joven.  Atu duni sai ne’e, se maka di’ak liu fali Faustino. Veteranu la ba ida, veteranu ami katuas ona, Falur, Maubuti, Aluk, Maunana ami katuas ona, husik sira mak kaer PNTL, se sira la di’ak aperta sira hanesan ita nia oan,” Lere hateten.

Lere hatutan, nia rasik avalia pesoál Komisáriu  Faustino da Costa ho Segundu Komandante Jerál, Komisáriu Mateus Fernandes, durante ne’e halo servisu di’ak tebes no hakraik aan implementa lei no orden koopera di’ak ho F-FDTL.

Iha parte seluk, Lere hatutan, to’o ona tempu ba joven sira ne’ebé iha kapasidade atu lidera futuru PNTL ho di’ak no profisionál no veteranu rezisténsia sira iha F-FDTL kontinua akompaña nafatin PNTL la’o ho susesu.

Antes ne’e, Vise-Ministru Interiór, António Armindo rekoñese Governu diskute mandatu Komandante PNTL nian, maibé asuntu ne’e sei konsidera segredu Governu nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here