Enkontru Ministru Prezidénsia Konsellu Ministru, Fidelis Manuel Leite Magalhães, no ekipa CDT-TL, iha Palásiu Governu. Imajen/Mídia PCM

DILI, 12 janeiru 2021 (TATOLI)–Estadu Unidu Amérika (EUA) sei fó apoiu orsamentu millaun $285 ba Governu Timor-Leste hodi finansia projetu bee, saneamentu, drenajen no edukasaun.

Apoia ne’e sei liuhosi selebrasaun akordu entre reprezentante EUA iha Timor-Leste no Compact Development Team Timor-Leste (CDT-TL).

Relasiona ho apoiu ne’e, ekipa CDT-TL hasoru malu ho Ministru Prezidénsia Konsellu Ministru, Fidelis Manuel Leite Magalhães, hodi relata kona-ba atividade ne’ebé relasiona ho Millennium Challenge Corporation (MCC).

“Ami relata atividade tinan 2020, nune’e mós ko’alia kona-ba atividade ne’ebé sei halo iha tinan 2021. Buat ne’ebé importante tebes mak Ministru fó nia apoiu tomak ba projetu ida-ne’e no ami hotu hamutuk ko’alia no prepara aselera kompaktu ba oin. Iha juñu asina ona akordu ho Amérika, ba projetu rua ho valór orsamentu millaun $285 (valór bele iha mudansa),” Diretór Ezekutivu CDT-TL, Constâncio Conceição Pinto, hateten hafoin ramata enkontru ho Ministru Fidelis, iha Palásiu Governu, tersa ne’e.

Karik projetu ne’e realiza iha juñu nia laran, maka ekipa sei implementa kedan projetu ho durasaun tinan-lima.

Iha outubru tinan kotuk, ekipa kompaktu selebra konkratu ho EUA, maibé tanba evolusaun pandemia maka la konsege implementa projetu, maibé konsege realiza atividade atu kompleta estudu viabilidade ba projetu rua.

Durante realiza estudu viabilidade, buat ne’ebé sai impedementu ba ekipa responsável projetu maka atu mobilizasaun tékniku.

“Pesoál sira ne’e mai hosi rai-li’ur, tanba vírus Corona maka sira labele halo viajen mai Timór hodi halo instalasaun ekipamentu no halo estudu viabilidade,” nia akresenta.

CDT serbisu hamutuk ho Ministériu Obras Públikas (MOP), Ministériu Edukasaun, Juventude no Desportu (MEJD) hodi aselera prosesu ne’e ba oin.

Nune’e mós, halo koordenasaun ho Ministériu Negósiu Estranjeiru no Kooperasaun (MNEK), Ministériu Finansa (MF), Ministériu Solidariedade Sosiál no Inkluzaun (MSSI), Ministériu Agrikultura no Peska (MAP), Sekretaria Estadu Igualdade no Inkluzaun (SEII) no Sekretáriu Estadu Ambiente (SEA).

Iha fatin hanesan, Ministru Fidelis apresia servisu CDT-TL no husu atu kontinua hala’o atividade hodi asegura investimentu MCC iha Timor-Leste.

“Husu CDT-TL atu prepara planu asaun sira hodi kompleta estudu viabilidade, prepara asina akordu no prosesu estabelesimentu MCC ba implementasaun kompaktu. Husu mós ekipa atu kontinua hala’o serbisu ho Governu Timor-Leste, liuliu ministériu relevante sira ho MCC hosi Estadu Unidu Amérika, hodi asegura prosesu ba dezenvolvimentu kompaktu,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here