Prezidente Autoridade Munisípiu Baucau, Olivio “Bou Lesa” Freitas hasai retratu hamutuk ho Goverante sira. Imajen/Espesiál.

DILI, 12 janeiru 2021 (TATOLI)–Prezidente Autoridade Munisípiu Baucau, Olivio Bou Lesa Freitas, kompromete sei promove redusaun karbonu no mos dezenvolve governasaun ho jestaun administrativa ne’ebé di’ak.

“Servidór ida di’ak la signifika tenke hotu-hotu tuur iha kargu, maibé servidór di’ak mak hotu-hotu hatudu servisu ho konsentrasaun, badinas, disiplina, sakrifisiu hodi hamosu rezultadu progresivu no mudansa sistemátika iha povu Baucau nia leet”, nia akresenta iha diskursu bainhira toma pose hanesan Prezidente Autoridade.

Nia hatutan, hakarak Baucau sai koezaun sosiál, asesibilidade ho ambiente trankuilu ho paradigma modelu dezenvolvimentu ekonómia iha artikulasaun ho ekonómia sosiál merkadu.

“Sidadaun hotu-hotu bele asesu ba kualidade vida mínimu no dezenvolvimentu sustentável”, haktuir testu diskursu ne’ebé TATOLI asesu, tersa ne’e.

Tuir nia, Baucau atu ba oin presiza promove kolaborasaun no kooperasaun ho parseiru sira hotu, atu atinje vizaun ne’e, ema hotu ho nia responsabilidade.

Jeografikamente, nia informa, Baucau nia rai luan hamutuk 1.501,85 km2, kompostu hosi Postu-Administrativu neen, suku 59 no aldeia 281 ho totál populasaun hamutuk 132.925.

Jeralmente, nia esplika, problema prinsipál sira ne’ebé populasaun enfrenta mak ki’ak, má nutrisaun, kualidade edukasaun, kualidade prestasaun saúde, estrada, eletrisidade, bee-moos, saneamentu báziku, dezempregu, konflitu sosiál no dependénsia ba produtu eksternu.

Jornalista       : Osória Marques

Editór             : Cancio Ximenes

HAKEREK NO HATÁN

Please enter your comment!
Please enter your name here