Polísia Unidade Tránzitu prende karreta Toyota Rava ho númeru matrikula A13442 iha area Hudi-Laran tanba kontra sinais transit, kinta 07 janeiru 2021. Imajen Tatoli/António Gonçalves

DILI, 12 janeiru 2021 (TATOLI)–Durante janeiru to’o 31 dezembru 2020, Polísia Munisípiu Dili, Seksaun Investigasaun Kriminál rejista kazu krime hamutuk 1.694 maka akontese iha área jurisdisaun Munisípiu Dili.

Komandante PNTL Munisípiu Dili, Superintendente Xefe Henrique da Costa. Imajen Tatoli/Eugénio Pereira

Komandante Polísia Munisípiu Dili, Superintendente Xefe, Henrique da Costa hateten, hosi kazu krime 1.694 ne’e, tipu kazu ne’ebé akontese aas liu mak ofensa integridade fíziku simples ho númeru 543 kazu.

Kazu sira ne’e rejista aas liu mai hosi área Polísia Eskuadra Don Aleixo, Kristu Rei, no menus liu kazu krime maka Postu Polísia Atauro nian.

“Kazu ofensa integridade simples ho númeru 543, maus tratu ba konjuga ba violénsia doméstika 213, no kazu ameasa 122, kazu fortu agravadu 111,” informa Superintendente Xefe, Henrique ba jornalista, ohin, iha Komandu PNTL, Dili.

Kazu sira ne’ebé akontese, parte PNTL halo prosesu aprezenta ba Ministériu Públiku hodi prosesa autór balun ba tribunál, balun kumpre ona sentensa iha prizaun no kazu balun pendente hodi hein prosesu investigasaun kle’an.

“Kazu hirak ne’e hotu ita prosesa ba Ministériu Públiku hodi enkamiña prosesu ba tribunál,” nia hateten.

Nia hatutan, suspeitu balun ne’ebé envolve iha kazu krime sira ne’ebé rejistu halai lakon, maibé Ministériu Públiku hasai mandadu hodi autoridade seguransa buka tuir nafatin autór sira.

Komandu PNTL Dili mós halo separasaun ba kazu 2020 nian kompara ho kazu 2019 nian rejista aas liu.

Atu hamenus kazu krime hirak ne’e, PNTL Dili estabelese kooperasaun servisu ho Konsellu Polisiamentu Komunitáriu (KPK) liga servisu ho Ofisiál Polísia Suku (OPS) hodi buka solusaun rezolve kuakér kazu krime sira ne’ebé akontese iha aldeia no suku tuir dalan família nian.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here