Prezidente FFTL, Francisco Jeronimo entrega sertifikadu AFC Cup bá prezidente Lalenok United FC, Pedro Belo, hodi reprezenta Timor-Leste iha jogu AFC Cup 2021. Imajen/Lalenok

DILI, 09 janeiru 2021 (TATOLI) – Federasaun Futeból Timor-Leste (FFTL), ohin, iha salaun Xanana Sport Centre, Dili, entrega sertifikadu Kopa Asian Football Confederation (AFC Cup)  bá klube Lalenok  United FC ne’ebé reprezenta Timor-Leste iha AFC Cup 2021.

Prezidente Lalenok United FC,  Pedro Belo agradese ba FFTL ne’ebé esforsu maka’as hodi lori Lalenok hakat tan pasu ida baá nivel internasionál liuhosi partisipasaun Lalenok United FC nian iha AFC Cup 2021.

“Lori estrutura klube hotu hakarak hato’o ami nia agradese bá estrutura FFTL tomak ne’ebé mak durante ne’e esforsu hodi ami konsege hetan lisensa. Agradese mós bá Sekretáriu Estadu Juventude no Desportu ne’ebé apoiu mós ami liuhosi suporta osan bá iha liga hodi Lalenok kompete to’o ohin loron hakat ona bá oin,” Pedro Belo hateten.

Maski pozitivu ona atu bá kompete iha jogu AFC Cup 2021, maibé Pedro relata  katak jogadór seidauk sufisiente. Tanba ne’e parte jestaun sei tur hamutuk nune’e bele haree hodi rekruta tan jogadór.

Sorteiu ba AFC Cup sei hala’o iha loron 27 janeiru iha Malázia, nune’e foin bele hatene Lalenok sei joga hasoru ekipa hosi nasaun ne’ebé. Maski nune’e, nasaun neen (6) mak sei lori nia klube neen partisipa iha AFC Cup ne’e maka hanesan Myanmar, Indonézia, Cambodia, Laos, Brunei ho Timor-Leste.

 Lalenok Asina kontratu tinan tolu ho Strong Beer-DS

Prezidente Lalenok United FC, Pedro Belo asina kontratu ho kompañia Strong Beer-DS ka loja Creative Furak, hodi sai hanesan patrosinadór bá Lalenok United FC. Imajen/Lalenok

Hosi sorin seluk, iha loron hanesan no iha edifísiu Lalenok United FC nian iha Fatuhada, Dili, kompañia Strong Beer-DS ka loja Creative Furak asina kontratu ho klube Lalenok United FC bá tinan tolu hodi sai hanesan patrosinadór.

Diretór Strong Beer, Anto Henrick hanesan mós diretór ba loja Creative Furak hatete, kontratu ne’ebé sira halo ho Lalenok hanesan parte ida hodi hametin di’ak liu tan relasaun entre parte rua iha area negósiu  nian.

“Ami nia prezensa ne’e atu suporta no lori dezenvolvimentu desportu ba oin, liu-liu futeból,” Anto Henrick hateten.

Nia dehan bainhira sira-nia kompañia nafatin iha Timor-Leste to’o bainhira de’it sei suporta Lalenok no futeból iha Timor-Leste.

Pedro Belo, prezidente Lalenok United FC hateten, loja Creative Murak la’ós foin sai patrosinadór bá Lalenok maibé uluk kedan sai ona hanesan patrosinadór.

Pedro Belo hato’o agradese bá emprezáriu estranjeiru ida ne’ebé laran di’ak hodi hamutuk ho Lalenok hodi dezenvolve futeból iha Timor-Leste.

Entretantu, kona-ba montante osan no saida-saida mak kompañia ne’e oferese bá Lalenok, Pedro Belo deside la fó sai ba públiku tanba internal parte rua-nian.

Lalenok mós iha ona nia patrosinadór prinsipál sira seluk hanesan Bintang, CEMILL, Folsom no seluk tan.

Italo Suarez eroi ba Lalenok

Prezidente Lalenok United FC, Pedro Belo, oferese kontratu bá jogadór estranjeiru Italo Suarez. Imajen/Lalenok

Prezidente Lalenok United FC, Pedro Belo ho estrutura tomak konsidera jogadór Brazileiru, Italo Suarez hanesan eroi bá Lalenok tanba hosi nia tempu mak lori klube ne’e hosi segunda divizaun promove ba primeira divizaun no sai kedan hanesan  ekipa kampiaun iha 2019.

“Italo la’ós jogadór foun ba Lalenok, nia jogadór antigu ida nia mai iha Timor – Leste iha 2017 bainhira Lalenok sei iha segunda divizaun no nia mak lori Lalenok sa’e ba primeira divizaun no ikus kampiaun kedan liga, tasa 12 Novembru no super tasa, ami konsidera nia hanesan eroi,” Pedro Belo hateten.

Lalenok, ohin, oferese ona kontratu ba jogadór estranjeiru ne’e ho durasaun tinan ida hodi bele reforsa Lalenok iha Liga Futeból Timor-Leste, tasa 12 Novembru no jogu AFC Cup 2021.

“Kontratu ne’ebé ami fó bá Italo atu reforsa Lalenok iha jogu saida de’it,” Pedro Belo hateten.

Iha 2020, Italo obrigadu tenke husik Lalenok hodi bá reforsa klube seluk iha Brazil, maibé Lalenok hetan protesta barak hosi nia adeptu no apoiante sira, nune’e iha 2021 Lalenok lori fila hikas jogadór ne’e mai TL.

Lalenok mós aumenta tan kontratu bá nia jogadór anterior sira hanesan, Gumario Moreira hanesan defeza aumenta tan bá tinan ida, Julião Mendonça defeza aumenta bá tinan ida, guarda rede Fagio Pereira no jogadór seluk sei halo mós kontratu hanesan iha tempu besik.

Jornalista   : Hortencio Sanchez

Editór         : Francisco Simões

HAKEREK NO HATÁN

Please enter your comment!
Please enter your name here