Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 07 janeiru 2020 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hasai ona komunikadu formál hodi husu ba públiku labele prodús informasaun falsa (hoax) relasiona ho surtu COVID-19 durante períodu Estadu Emerjénsia (EE).

“Labele prodús no espalla informasaun hoax ne’ebé hakle’uk fali objetivu loloos no objetivu di’ak sira hosi polítika no implementasaun Estadu Emerjénsia ba COVID-19 durante ne’e,” Sekretáriu Estadu Akara, hateten liuhosi nota ne’ebé Agência TATOLI asesu, kinta ne’e.

Governante ne’e husu atu evita produsaun informasaun hoax tanba objetivu loloos hosi EE durante ne’e maka halo parte Estadu Timor-Leste nia esforsu ba realizasaun dever hodi proteje sidadaun no povu Timor-Leste nia direitu fundamentál sira ba moris di’ak no moris saudável. 

“Laiha intensaun no laiha objetivu polítika hosi ukun na’in ruma ba Estadu Emerjénsia iha ámbitu COVID-19. Iha mak Estadu, liuhosi Governu nia dever atu proteje sidadaun no povu hosi impaktu surtu, liuliu aspeitu saúde no mós sósiu ekonómiku,” Governante tenik.

Tanba ne’e, SEKOMS kontinua husu atu entidade hotu tenke sériu kumpre duni regra no medida prevensaun durante implementasaun EE ba da-siak.

“Tenke uza máskara, fase liman beibeik ho sabaun, mantein distánsia fíziku no sosiál. Kuidadu sériu ba saúde ho dalan konsumu ai-han ne’ebé saudável no hala’o ezersísiu loron-loron hodi haforte ida-idak ninia imunidade kontra moras sira hanesan COVID-19,” nia akresenta.

Ikus liu, Sekretaria Estadu ne’e apela ba públiku labele monu ba informasaun hoax ne’ebé baralla esforsu kombate no prevene surtu iha rai doben ida ne’e.

“Governu husu sidadaun tomak atu tau fiar nafatin no fiar liu ba informasaun ofisiál  ne’ebé publika hosi Governu, liuliu Ministériu Saúde tanba informasaun ofisiál hirak ne’e kredível duni,” nia fó hanoin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here