Vise-Ministru Administrasaun Estatal, Lino de Jesus Torezao. Imajen/Antonia Maia Gusmao.

DILI, 07 dezembru 2021 (TATOLI)—Vise-Ministru Administrasaun Estatál (MAE), Lino de Jesus Torrezão, ohin, halo klarifikasaun ba informasaun ne’ebé espalla iha mídia sosiál katak kandidatu Abílio Mesquita sai  Prezidente Autoridade Munispiu Dili nian ne’e, konsidera hanesan informasaun ne’ebé la loos tanba lista kandidatura sira foin iha selesaun dokumentu.

“Ha’u atu klarifika kona-ba informasaun ne’ebé agora viral loos iha mídia sosiál kona-ba selesaun ba Administradór Munisípiu no Prezidente Auroridade Munisipál Dili nian, ha’u atu halo loos katak naran ne’ebé tau iha númeru uluk ne’e la signifika nia mak atu sai kandidatu ka selesiona ba Prezidente Autoridade Munisípiu maibé ita tau númeru uluk ne’e tanba haree hosi alfabetizasaun. Tanba ne’e, labele komprende sala tanba naran ne’ebé sai ne’e provizóriu hela seidauk finál,” Lino de jesus Torrezão klarifika asuntu ne’e liuhosi konferénsia imprensa iha Edifísiu MAE, Caicoli, Dili.

Nia hatutan, prosesu selesaun ba Prezidente Autoridade Munisípal ho Adminidtradór Munisipál loloos ne’e iha prazu loron bazea ba enkuadramentu legál ida-ne’ebé mak agora daudaun iha lei númeru 5/2016 no dekretu-lei Nú. 3/2016 ne’e hateten klaru kona-ba selesaun espesiál ba Prezidente Autoridade Munisipál ho Administradór Munisípiu ninia intervinente dahuluk mak Ministériu Adminitrasaun Estatál (MAE), Komisaun Funsaun Públika (KFP), ho tan Primeiru Ministru (PM).

“Agora, ida-ne’e forma no fó pose ba komisaun espesiál selesaun knaar dahuluk, bazea ba dekretu  Governu Nú. 5 artigu 6, tuir mai MAE sei kandidata no sei fó avizu abertura ba prosedimentu espesiál selesaun no aprezentasaun ba kadidatura. Nune’e, komisuan espesiál eleisaun sira sei halo verifikasaun ba prosesu kandidatura tomak. Tuir mai prosesu kadidaura ne’e halo selesaun ramata hotu ona sei públika lista admitida no deskluida ba provizoriamente,” Lino hateten.

Nia dehan, Públika lista admitida no eskluida finál hamutuk ho avizu ba ezame no atu hateten loloos katak komisaun espesiál ba selesaun ne’e, nia mak fó duni ezame eskrita ba kandidatu ne’ebé mak aprovadu ona atu tuir ezame no kópia dokumentu hotu-hotu kona-ba prosedimentu selesaun por méritu ba iha grupu tekniku interministeriál.

“Antes atu tama ba prosesu tomada pose lista sira ne’e, sé mak pasa ezame, iha selesaun dokumentu sei haruka ba Konsellu Ministru mak sei nomeia. Tanba antes sira atu tama ba Konsellu Ministru sei liu uluk konselu konsultivu munisipál, mak sei apresia ba kandidatu ne’ebé mak pasa iha ezame. Fila-fali mai iha rezultadu permanente mak atu lori nia rezultadu ne’e halo rezolusaun mak hafoin ministru sei lori ba iha Konsellu Ministru,” nia dehan.

Nia informa, kandidatu na’in ualu (8) ne’ebé tuir prosedimentu selesaun espesiál Prezidente Autoridade Munisípiu Dili mak hanesan Abílio Mesquita, António Monis Clau, Duarte Quintão, Guilerminha Filomena Saldanha, Ivete de Fátima Sarmentu de Oliveira, Lourenco Rodrigues Carvalho, Manuel da Silva, no Sabino da Costa.

“Ha’u atu hateten de’it katak agora daudaun kandidatu ba Prezidente Autoridade Munisípiu ne’e la’os Dili mesak maibé iha Munisípiu lima mak agora daudaun iha prosesu dahuluk loloos no hahú fó avizu ne’e iha loron 30 dezembru. No, loron efetivu ba prazu atu finaliza kandidatu ida-ne’ebé definitivu loron lima, hahú iha loron 30 sura efetivu ne’e, segunda, tersa to’o sesta. Tanba ne’e, ohin loron ikus atu bele konklui,” nia dehan

Nia hatutan, bainhira konklui hotu tiha komisaun espesiál selesaun sira sei halo enkontru atu haree fila-fali sira-ne’ebé mak eskluidu no sira ne’ebé mak permanente. Tanba, nia informa, sira-ne’ebé kandidatu admitidu provizoriamente númeru 1, 4, 5, 8 ne’e komisaun espesiál halo tiha ona no kandidatu ne’ebé mak eskluidu provizóriu mak númeru 2, 6, no 7 no ho fundamentu hirak ne’e hanesan mensiona iha lista provozória.

“Sira-ne’ebé mak eskluidu ne’e provizóriu, agora sira-ne’ebé mak admitidu mós admitidu provizóriu seidauk tama iha definitivu. Ninia prosesu foin ita hakat ba faze dahuluk avizu sai tiha mak ita ba faze segundu mak komisaun espesiál selesaun sei halo enkontru ida atu define no identifika loloos hirak ne’ebé sei eskluidu ne’e, sei kompleta fila-fali sira-nia dokumentu,” nia hateten.

Nia afirma, iha kandidatu definitive nia laran ne’e iha kandidatu ne’ebé mak halo reklamasaun no sé mak iha reklamasaun bele hato’o mai komisaun espesiál ka juri selesaun ninian, no sira fó resposta fila-fali ba kandidatu ne’ebé mak reklama.

“Agora lista provizóriu ne’ebé mak aprova iha unamidade asina hosi komisaun espesiál selesaun. Ha’u dehan ida-ne’e pasa ona automatikamente, sira provizóriu bele sai fali definitivu, ne’e tama ba faze daruak. Permanente hotu tiha ona mak ita marka loron data para atu sira mai tuir ezame eskrita. Tanba ne’e, agora ita labele hanoin katak lista provizóriu foin sai hanoin katak sai ba prezidente ona,” nia dehan.

Tanba ne’e, nia dehan, ohin loron rezultadu ikus ba selesaun dokumentu no aban tama ba halo enkontru ho komisaun espesiál selesaun atu define ba sira-ne’ebé mak esklui provizóriu ne’e kompleta hotu ona sira-nia  dokumentu ka lae.

Kona-ba teste, nia dehan, seidauk bele fó nia data loloos tanba selesaun dokumentu hotu mak foin bele determina. Tanba ne’e, nia apela ba públiku kona-ba informasuan ne’ebé sai viral, tanba ida-ne’e bele hateten katak halo presaun prosesu ba selesaun espesiál Prezidente Autoridade Munisípiu ho Administradór Munisipál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here