Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (06/01). Imajen TATOLI/Egas Cristovão

DILI, 06 janeiru 2021 (TATOLI)-Liuhosi reuniaun Konsellu Ministru (KM), ezekutivu sira halo diskusaun projetu Orgánika Autoridade Protesaun Sivíl.

“Primeiru-Ministru no Ministru Interiór, Taur Matan Ruak no Sekretáriu Estadu Protesaun Sivíl, Joaquim José Gusmão dos Reis Martins, aprezenta opsaun polítika-lejizlativa sira hanesan baze ba projetu Orgánika Autoridade Protesaun Sivíl,” Ministru Prezidénsia Konsellu Ministru, Fidelis Manuel Leite Magalhães, relata iha Palásiu Governu, hafoin reuniaun ezekutivu, kuarta ne’e

Portavós Governu ne’e dehan, projetu ne’e ho objetivu atu define atribuisaun, kompeténsia no estrutura orgánika Autoridade Protesaun Sivíl, liuliu ba prevensaun no reasaun asidente grave no katástrofe, prevensaun no protesaun ba populasaun inklui superintendénsia ba atividade bombeiru.

Iha loron 21 jullu 2020, Parlamentu Nasionál aprova proposta-lei númeru 16/V (2a)-Lei Protesaun Sívil ho votu maioria.

Notísia Relevante: PN Aprova Ona Proposta-Lei Protesaun Sívil

Lei ne’e mensiona kestaun neen hanesan dahuluk, asidente grave ne’ebé akontese extraordinária ho ninia efetu bele hamate ka hakanek ema, estraga sasán, animál no estraga ambiente.

Daruak maka auto-protesaun hanesan ekipa konjunta ida hodi apoia individuál, família, no komunidade ho tendénsia atu prevene ka minimiza atu labele fó afeita ba ema, materiál ambientál iha kazu dezastre naturál.

Datoluk, katástrofe hanesan asidente ne’ebé grave no sériu ne’ebé rezulta vítima iha territóriu nasionál.

Dahaat, planu emerjénsia hanesan dokumentu ne’ebé reúne informasaun no estabelese prosedimentu ne’ebé permite hodi organiza no emprega rekursu umanu ho materiál ne’ebé disponível iha situasaun emerjénsia.

Dalima, repozisaun normalidade hanesan rekupera situasaun normál ba funsionamentu instituisaun estadu ba iha atividade ekonómika no sosiál.

Ikus liu, sokorru mak fó asisténsia ka halo intervensaun durante asidente grave ka katástrofe hodi fó nesesidade dahuluk ba sobrevivénsia sira.

Lei protesaun sivíl sei la permite halo deklarasaun Estadu Emerjénsia maibé kompleta pilár defeza no seguransa.

Nune’e mós, sei la suspende direitu no liberdade sidadaun, maibé iha momentu balun sei restrinje ka limita sidadaun ninia direitu ho medida ne’ebé Governu sei hasai iha situasaun kalamidade, lei ne’e iha nesesidade atu moris.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here