DILI, 05 janeiru 2021 (TATOLI)--Relasiona ho engarrafamentu no asidente tráfegu ne’ebé sempre akontese, maka Ministériu Transporte no Komunikasaun (MTK) hamutuk Ministériu Interiór (MI) halo ona despaisu konjuntu hodi bele regulariza sirkulasaun kontentór sira iha Dili laran.
Despaisu konjunta ne’e asina foin lalais hosi Ministru Transporte no Komunikasaun, José Agostinho da Silva no Primeiru-Ministru no atuál Ministru Interiór, Taur Matan Ruak, ho númeru 6/MKI/ MI/2020 18 novembru 2020, kona-ba proibisaun sirkulasaun veíkulu pezadu no transporte kontetór.
Ministru José Agostinho, hateten iha nível polítika, ministériu rua halo diskusaun ba preparasaun implementasaun iha terrenu, ne’ebé sei akontese iha tempu badak.
“Iha tempu badak tékniku sira husi parte relevante sei halo reuniaun, karik bele aban halo reuniaun antes implementasaun,” Ministru informa hafoin ramata enkontru iha edifísiu MTK, Caicoli, tersa ne’e.
Enkontru ne’e partisipa hosi Vise Ministru Interiór, António Armindo, inklui entidade relevante hanesan Alfándega, Autoridade Portuáriu Timor-Leste (APORTIL), Diresaun Nasionál Transporte Terrestre, Polísia Nasionál Timor-Leste (PNTL).
“Ita-nia orientasaun ohin atubele halo koordenasaun ne’ebé di’ak ho entidade relevante hafoin bele prodús regra hodi tau iha fatin públiku sira hodi ema bele asesu kontestu husi ita-nia despaisu konjunta ne’e,” nia akresenta.
Enkontru nível polítiku sei realiza aban hamutuk ho nível tékniku atu haree mós ba ninia implementasaun.
“Aban sei halo konvokatóriu Diretór Jerál transporte, Diretór Nasionál Transporte Terrestre, Alfándega, PNTL inklui tékniku sira, hamutuk ho Ministru Interiór, Kámara Komérsiu no Indústria-Timor-Leste (CCI-TL, sigla portugés ), ne’ebé nu’udár sumbriña ba ita-nia empreza, atubele akresenta idea balun,” nia hatutan.
Antes ne’e, lei regula kontetór iha ona, ne’ebé fó responsabilidade ba ministériu tolu atu implementa maibé la konsege, tanba ne’e liuhosi reuniaun MTK no MI hamutuk ho entidade relevante atu haree filafali.
“Bainhira implementa ona, iha ema ruma la kumpre regulamentu ne’e sei aplika sansaun tuir kódigu estrada nian. Tanba ne’e maka ohin envolve entidade sira atu esplika,” governante ne’e fó hanoin.
Iha fatin hanesan, Vise-Ministru Interiór, António Armindo, hateten despaisu foun ne’e atu regula veíkulu pezadu sira sirkula tuir oras no labele halo engarrafamentu.
Oras sirkulasaun kontentór sira maka hanesan tuku hitu to’o sia dadeer.
“Husi tuku 10:00 to’o 10:45 sira bele la’o, maibé molok oras ne’e sira labele la’o iha Dili laran, nune’e movimentu bain-bain bele la’o no labele halo engarrafametu iha Dili laran,” nia dehan.
Enkuantu, parte lorokraik, hahú tuku 15:00 to’o 17:000, ne’ebé molok oras ne’e kontentór tenke sai ona hosi Dili laran.
Nune’e karreta sira ne’ebé maka hanesan membru Governu no transporte bain-bain ne’ebé maka atu fila ba uma iha tuku 17:00 labele halo engarrafamentu.
“Ita halo halo diseminasaun atu ema hotu komprende lai regra ne’e maka foin aplika ba kontentór sira,” nia hatutan.
Jornalista: Natalino Costa
Editora: Julia Chatarina
