Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 05 janeiru 2021 (TATOLI)-Asalta-malu entre grupu juventude sira iha Aldeia Diluhilin, Suku Beco, Postu Administrativu Suai Vila, Munisípiu Covalima, rezulta ema na’in-rua kanek todan.

Problema ne’e akontese iha  sábadu (02/01), ne’ebé deskonfia  kauza hosi problema privadu balun ne’ebé hada’et ba grupu.

Iha akontesimentu ne’e, parte PNTL Suku Beco hamutuk ho autoridade suku sira konsege akalma situasaun no halo detensaun ba suspeitu na’in-haat no na’in-ida halai lakon.

Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo, rekoñese konflitu ne’e rezulta uma komunidade nian balun hetan estragus.

“Ema sira ne’ebé asalta-malu iha Suku Beco; na’in-haat kanek, identifika suspeitu na’in-liman, maibé polísia detein na’in-haat no na’in-ida halai to’o agora polísia sei kontinua buka tuir,” Superintendente Xefe, Arnaldo de Araújo informa ba jornalista iha Komandu Jerál PNTL, Dili.

Kona-ba motivu loloos hosi konflitu ne’e, parte PNTL sei halo hela prosesu investigasaun no suspeitu sira daudaun ne’e sei detein hela iha sela polísia Covalima hodi hein prosesu investigasaun oras 72 no aprezenta ba  Ministériu Públiku Covalima.

Jornalista   : Eugénio Pereira

Editór        : Francisco Simões

2 KOMENTÁRIU

  1. Grupu sira, liu-liu GAM sira, sempre sai instrumentu ne’ebe individuu prolemador sira uza hodi rezolve sira-nia problema partikular. Maibe kulpa loloos ne’e Governu nian, tanba Governu maka la iha seriedade atu taka grupu sira-ne’e. Aban bainrua sira maka sei sobu nasaun.

  2. Grupo ida asaltu ne husi Organizasaun PSHT hatais roupa netan arte marsiais completo taka oin metin hodi tur hein ema nebe oin foun liu iha atea neba, kazu ne laos foin akontese maibe dala barak ona sira asalta e polisi ba to fatin sira sempre halai lakon, e nunka prosesu maibe ba akontesementu ikus ne sira tenta atu oho vitima sira tamba ne husi parte familia vitima la tur nonok e halo ezijensia ba polisia atu kaptura no fo sai iha media TVTL nebe destaka iha municipio para publico hatene hahalok criminozu husi Organizasaun arte marciais nebe Governo fo legalidade hodi atu oho povu estraga estabilidade soberano estado RDTL, ami komunifade ezize taka organizasaun arte marsiais nebe halo bebeik instabilidade no inseguransa iha komunidade nia let…..komentario husi familia vitima(Lolotoe)

HAKEREK NO HATÁN

Please enter your comment!
Please enter your name here