Komandante PNTL Munisípiu Dili, Superintendente Xefe, Henrique da Costa. Imajen Tatoli/Eugénio Pereira

DILI, 04 janeiru 2021 (TATOLI)–Komandu Polísia Nasionál Timor-Leste (PNTL) Munisípiu Dili halo ona investigasaun no detein ajente polísia ida nu’udar suspeitu ne’ebé ori pistola tiru kanek vítima Martinho Tasi-Rede, tinan 12, iha Aldeia 12 Outubru, Suku Comoro, Postu Administrativu Don Aleixo, Munisípiu Dili.

Kronolojia kazu ne’e akontese iha sesta (01/01/2021),  tuku 1:00 madrugada, ajente polísia ho inisiál MM hosi Unidade Orden Públiku (BOP) lori pistola Glock-19 tiru vítima iha parte kanotak liman loos borus ba liman karuk no daudaun ne’e vítima  sei halo tratamentu intensivu iha Ospitál Nasionál Guido Valadares (HNGV).

Komandante PNTL Munisípiu Dili, Superintendente Xefe, Henrique da Costa, informa sira-nia parte halo ona investigasaun no aprezenta ona relatóriu ba Komandante Jerál PNTL, Komisáriu Faustino da Costa no Segundu Komandante Jerál, Komisáriu Mateus de Jesus, atu bele foti desizaun.

“Membru ne’e ami detein ona, agora prosesu la’o hela ninia relatóriu ami aprezenta ona ba Komandante Jerál PNTL maka bele responde ba ida ne’e,” hateten Komandante Henrique ba jornalista iha Komandu PNTL, Caicoli, Dili.

Parte ekipa investigasaun kriminál PNTL rasik rekolla ona sasán evidénsia balun iha fatin akontesimentu hanesan, bala-musan no émbolku rua, no foti dadus hosi sasin no vítima kona-ba kronolojia akontesimentu ne’e.

“Motivu loloos hosi kazu ne’e ita hein de’it komandante jerál maka bele esplika,” nia hateten hodi lia tun tan dehan, parte investigadór PNTL mós sei foti deklarasaun balun hosi vítima hodi junta ho deklarasaun suspeitu MM nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here