Ministra Saúde, Odete Maria Freitas Belo, halo konfernesia imprensa iha Palaçio da Cinzás, Dili, Sabádu (02/01/2021). Imajen/Mídia MS.

DILI, 02 janeiru 2021 (TATOLI)—Ministériu Saúde (MS) rekoñese lapsu ne’ebé akontese relativamente ho kazu Covid-19 iha Kuarentena Tasi-Tolu iha loron 31 dezembru 2020.

Liuhosi konferénsia imprensa, ohin, iha Salaun Palácio das Cinzas, Caicoli, Dili, Ministra Saúde, Odete Maria Freitas Belo, klarifika katak, iha momentu ne’ebé ema hotu-hotu prepara taka tinan tuan 2020, Ministériu Saúde presiza rezolve problema ka lapsu ne’ebé akontese relativamente ho kazu Covid-19. Katak iha loron 31 dezembru 2020, Pilár sira Covid-19 nian, ne’ebé dezde inísiu estabelese iha Ministériu Saúde hodi responde ba asuntu Covid-19 iha Timor-Leste, deklara katak akontese lapsu ida relasiona ho evakuasaun pasiente ho pozitivu (+) Covid-19 ne’ebé deteta iha loron 31 dezembru 2020, hosi grupu estudante ka traballadór Timor-oan hosi Europa.

Notísia Relevante :COVID-19 iha TL aumenta ba ema na’in 13

Ministra Odete Maria Freitas Belo, hakarak fahe informasaun klaru no badak ba komunidade no povu Timor-Leste tomak katak, iha loron 31 fulan-dezembru 2020, laboratóriu nasionál saúde deteta pasajeiru ho naran João Baptista, idade 26, data moris 29 setembru 1994. Asimtomátiku no hala’o kuarentena iha Tasi-Tolu.

Iha lista rejistu ba entrada pasajeiru sira nian, rejista pasajeiru ho naran João iha ema na’in-rua:
1. João Baptista ho idade 26, loron moris 29 Setembru 1994
2. João Marçal Baptista ho idade 31, loron moris 06 Juñu 1989
3. João ne’ebé rejista iha Tasi-Tolu na’in-neen (6) maibé la’ós Baptista.
Laboratóriu Nasionál Saúde, katak Ministra Odete Maria Freitas Belo, hato’o ninia rezultadu teste katak, João Batista, idade 26, mak konfirmadu pozitivu (+) Covid-19. Informasaun ida-ne’e hatudu liuhosi formuláriu PDF ne’ebé tuir ninia lala’ok entrega direta ba ema ne’ebé afetadu ho Covid-19.

Infelizmente, Ministra Saúde Odete Freitas Belo, hateten evakuasaun hala’o fali ba pasajeiru João Marçal Baptista, idade 31, ne’ebé rezultadu teste negativu.

Nia hatutan, Ministériu Saúde identifika problema ida-ne’e iha loron 31 dezembru 2020, iha tempu preparasaun taka tinan foun iha dadeer no públiku hetan kedas informasaun kona-ba lapsu ida-ne’e antes Ministériu Saúde hato’o ninia deklarasaun.

Lori Ministériu Saúde nia naran, Ministra Odete Maria Freitas Belo, deklara rekoñese lapsu ne’ebé akontese, asaun ne’ebé reprezentante pilár sira foti liuhosi enkontru estraordinária hamutuk ho Ministra Saúde iha 31 dezembru 2020, oras tuku 10:00 mak hanesan:

1. Evakua Sr. João Batista ba Klínika Vera Cruz hodi hala’o kedas swab ba teste PCR
2. Hala’o Swab hodi teste PCR ba pasajeiru tomak ne’ebé kumpre sira-nia faze kuarentena períodu daruak ho loron hanesan (total loron rua nulu resin ualu)
3. Organiza hodi hafahe pasajeiru sira ne’ebé iha partilla kuartu
4. Husu ba responsabilidade pilár sira ne’ebé iha relasaun ho erru ne’ebé akontese hodi prepara sira-nia relatóriu kronolojia ba akontesimentu ida ne’e no submete mai Ministériu Saúde nia meza
5. Informalmente liuhosi komunikasaun WhatsApp, Ministra Saúde halo relatóriu badak ba koñesimentu Vise-Primeiru Ministru ka Primeiru Ministru ein Ezersísiu nia meza
6. Bazeia ba instrusaun Vise-Primeiru Ministru ka Primeiru Ministru ein Ezersísiu, Gabinete Inspesaun Auditória Saúde hahú kedas sira-nia investigasaun iha loron 1 janeiru 2021
7. Prepara hodi hala’o konferénsia imprensa iha loron 1 janeiru 2021 hodi deklara no rekoñese ba públiku ba erru ne’ebé akontese.
Ministra Saúde Odete Maria Freitas Belo mós deskreve asaun sira ne’ebé la konsege realiza ho ninia difikuldade sira mak hanesan:

1. La konsege rekolla amostra Swab ba pasajeiru sira iha kuarentena Tasi-Tolu, tuir planu asaun ne’ebé deside iha enkontru estraordinária tanba hetan rejeisaun hosi pasajeiru sira rasik inklui pasajeiru na’in-lima (5) ne’ebé dezenvolve hela sintoma Covid-19

2. Konferénsia imprensa ne’ebé presizamente hala’o iha loron 1 janeiru la konsege realiza

3. Ikus liu, pesoál saúde konsege rekolla amostra liuhosi Swab ba teste PCR iha loron 1 janeiru liuhosi negosiasaun naruk ho pasajeiru na’in-lima (5) ne’ebé ho sintoma Covid-19.
Nia informa, situasaun atuál pasajeiru sira ne’ebé obrigatóriamente hala’o kuarentena daruak sei kontinua kumpre sira-nia tempu kuarentena to’o loron 28 tuir MS nia protokolu preventivu Covid-19 nian.

“Atu remata ami-nia deklarasaun ida ne’e ami hakarak hato’o katak rezultadu hosi teste PCR sei informa iha segunda (4/01), kona-ba asuntu investigasaun Gabinete Investigasaun Auditória sei submete mai MS iha domingu (3/01), lala’ok ka normas kona-ba revelasaun rezultadu investigasaun sei la’o tuir Lei no regra investigasaun MS nian,” Ministra Odete Belo hateten.

Nia lia tun tan dehan, “atu hatete sala ka loos liuhosi investigasaun, investigasaun ita halo hela ita husu para aban 3 janeiru, ita hein katak ita-nia Gabinete Investigasaun Auditória Saúde nian sei hato’o informasaun ba ita atu hatete katak problema ne’e akontese tanba sá, sera ke tanba despropózitu halo problema iha ita-nia kuarentena ne’ebá k por sem querer tanba iha asuntu administrativu ruma ne’ebé mak ami presiza hadi’a no mós iha tempu ne’ebá bainhira ita hasai ita-nia pesoál sira iha mós konfrontasaun entre pasajeiru sira ne’ebé mak iha kuarentena Tasi-Tolu ho pesoál sira hosi MS nian.”

Ministra Saúde Odete Freitas Belo haktuir tan, iha tempu ne’ebá envolve mós Polísia sira para bele atua hodi hasai pesoál sira ne’ebé mak MS deteta kazu pozitivu iha tempu ne’ebá entaun la’ós dehan parte hosi MS nian maibé presiza atu haree oinsá kolaborasaun hosi pasajeiru sira ne’ebé mak iha Tasi-Tolu.

“Entaun ita labele dehan sala ka loos, maibé depende ba iha investigasaun ne’ebé mak iha. Ami hakarak atu deklara provizoriamente fallansu ka lapsu ida ne’e akontese tanba husi MS, maibé iha parte ida ne’ebé? Ida ne’e mak presiza atu halo investigasaun,” Ministra Odete Freitas Belo afirma tan.

Jornalista :Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here