Vice-Ministru Administrasaun Estatal, Lino de Jesus Torezao. Imajen/Antonia Maia Gusmao

Em prinsípiu nasaun Timor-Leste presiza estrutura lei barak tebes tuir nesesidade liña setorais hotu-hotu. Maibé, karik intensaun liga ba polítika desentaralizasaun administrativa mak urjénsia hosi intensaun refere útil tebes mak lei poder lokál, lei eleisaun munisipál, lei finansa munisipál, lei aprovizionamentu munisipál, lei patrimóniu munisipál ho nia regulamentu koplementáriu barak loos.

DILI, 31 dezembru 2020 (TATOLI)—Vise-Ministru Adiministrasaun Estatál (MAE), Lino de Jesus Torrezão afirma katak atu implementa desentralizasaun administrativa hodi atinji poder lokál ba munisípiu sira para hetan poder própriu liuhosi eleisaun munisipál.

“Bainhira ita ko’alia kona-ba desentralizasaun administrtaiva mak tenke lei poder lokál. Entaun aban bainrua Prezidente Autoridade ka Administrador tenke halo eleisaun iha munisipál de’it no sei la nomeia ka la tuir konkursu ruma,” nia dehan.

Implementasaun polítika desentralizasaun administrativa ne’e la’ós responsabilidade Ministériu Administrasaun Eestatál (MAE) nian de’it maibé ho ministériu relevante sira hodi fó apoiu para prosesu desentralizasuan ne’e la’o ba oin ho efetivu. Nune’e, tinan haat ba to’o lima mai, Governu bele atinji objetivu poder lokál iha munisípiu sira tuir artigu 72 hosi konstituisaun.

Artigu 72 konstituisaun RDTL hakerek kona-ba poder lokál iha alinea 1) sei harii kbiit lokál ho ema ne’ebé koletivu iha rai-laran, ne’ebé iha órgaun reprezentativu, ho knaar atu organiza partisipasaun sidadaun ida-idak nian kona-ba solusaun problema rasik iha sira-nia komunidade no atu promove dezenvolvimentu lokál, no la afeta partisipasaun Estadu nian. Alinea 2) organizasaun, kompeténsia, funsionamentu no kompozisaun órgaun kbiit lokál nian sei define tuir lei. Durante mandatu Governu dahitu fó ona delegasaun kompeténsia ba munisipiu haat hanesan Baucau, Bobonaro, Dili no Ermera.

Atu hatene kle’an liu kona-ba polítika dessentralizasaun ne’e, joralista Agência TATOLI, Osória Marques, hala’o entrevista ho Vise-ministru Adiministrasaun Estatal (MAE), Lino de Jesus Torrezão, iha nia knar fatin, Colmera, Dili, foin lalais ne’e.

Progresu desentralizasaun administrativa to’o agora ne’e oinsá ona?

Progresu polítika desentralizasaun administrativa introdús liuhosi diploma legál ida-ne’ebé hanaran Dekretu Lei nú. 3/2016 16 de Marsu, estratéjia kona-ba tranzisaun graduál servisu Administrasaun Munisipál no Autoridade Munisipál sira iha poder lokál nia-laran, liuhosi faze fundamentál tolu (3).

Dahuluk, mak faze deskonsentrasaun administrativa. Daruak mak faze desentralizasaun administrativa institusionál. Datoluk mak faze desentralizasaun administrativa territoriál. Atu dehan deit katak progresu desentralizasaun administrativa oras ne’e daudaun tama ona ba faze desentralizasaun institusionál. Ne’e signifika, servisu Administrasaun Munisipál no Autoridade Munisipál nian sai hosi administrasaun direta ba fali administrasaun indireta, hodi asegura prestasaun bein no servisu públiku lokál nian, hodi sujeita de’it ba superintendénsia membru Governu nian.

Se hanesan ne’e, oinsa ho progresu lei poder lokál nian?

Atu dehan de’it katak lei poder lokál seidauk iha.  Iha de’it mak proposta-lei poder lokál ne’e liuhosi informasaun kredivél katak iha hela prosesu audiénsia públika.  Prosesu audiénsia públika ne’e antes komisaun A atu halo diskusaun hodi aprova no Prezidente Repúblika promulga. Entaun, presiza halo audiénsia ho parte relevante sira liuliu tuun ba iha komunidade nia leet.

Atu hatete katak, lei ba autoridade ka poder lokál nian iha ona Prezidente Repúblika hodi lori ba Parlamentu Nasionál atu halo diskuaun. Komisaun A mak iha kompeténsia atu halo audiénsia públika ba komunidade sira. MAE mak halo proposta bá, liuhosi rezolusaun Governu ba iha Parlamentu Nasionál tanba Parlamentu Nasionál mak halo lei.

Timor Leste presija lei hira molok implementa politika desentralizasaun?

Em prinsípiu nasaun Timor-Leste presiza estrutura lei barak tebes tuir nesesidade liña setorais hotu-hotu. Maibé, karik intensaun liga ba polítika desentaralizasaun administrativa mak urjénsia hosi intensaun refere útil tebes mak (1) lei poder lokál, (2) lei eleisaun munisipál, (3) lei finansa munisipál, (4) ei aprovizionamentu munisipál, (5) lei patrimóniu munisipál ho nia regulamentu koplementáriu barak loos.

Polítika desentralizasaun ne’e oras ne’e tama iha faze saida ona?

Interpretasaun polítika ba progresu implementasaun programa polítika desentralizasaun administrativa tama ona iha faze desentralizasaun administrativa instituisionál. Katak, servisu deskonsentrasaun iha munisípiu 12 bainhira hatun ona iha muniípiu ida-idak, para sira bele hala’o ona sira-nia knaar ka fó ona kompeténsia ba sira.

Ita fó kompeténsia ba sira, ezemplu, ita fó kompeténsia ba Ministériu Peska no Agrikultura (MAP), Jestaun Merkadu, ita mós fó kompeténsia asaun dominiu sosiál inklui Protesaun Sívil sira, Rejistu Notariadu Servisu Kadasterais. Kompeténsia hirak ne’e sira hala’o ona. MAE mós fó ona kompeténsia ba organizasaun naun govermentál no organizasaun komuitária ne’e, entrega ona ba munisípiu ida-ida. Sira ne’e hotu mak dehan deskonsentrasaun administrativa instititusionál.

Bele esplika diploma ministeriál nú. 20/2014, 24 jullu kona-ba estrutura organika funsionál diresaun jerál iha desentralizasaun administrativa?

Atu informa de’it katak organika refere revogadu ho organika ministáriu Nú. 46/2019 kona orgánika dirasaun jerál desentralizasaun administrative. Maibé, oras ne’e daudaun hein hela armonizasaun ba dekretu lei nú. 53/2020 kona-ba orgánika Ministériu Administrasaun Estatál (MAE).

Objetivu prinsipál hosi polítika desentralizasaun administrativa?

Kria oportunidade foun ba partisipasaun demokrátika, promove instituisaun Estadu ida forte no estabelese prestasaun servisu públiku ho efetivu, efisiente no ekitativu.

Bele esplika natureza hosi lei poder lokál no mós misaun hosi lei refere ho ninia distribuisaun kpmeténsia sira?

Lei poder lokál nia natureza mak atu harii munisipalidade maibé ho ninian natureza jurídiku rasik signifika katak iha autonómia administrativa rasik, finanseira, patrimoniál, órgaun reprezantetaivu, territóriu no populasaun.

Administrasaun Munisipál no Autoridade Munisipál sira-nia misaun mak atu asegura hala’o funsaun administrativu Estadu nian liuhosi ezekuta polítika no programa sira Governu nian iha nível lokál hodi bele promove no orienta dezenvolvimentu ekonómiku-sosiál. No, liuhosi prestasaun bein no servisu públiku sira iha munisípiu, konzuga ho artigo 33 kona-ba atribuisaun, lei proposta de lei nú 29/III (3) kona-ba testu aprovadu votasaun finál globál, lei poder lokál no desentralizasaun administrativa.

Iha kualker projeitu lei ka proposta lei sempre iha aspeitu tolu (3) mak hanesan prinsípiu, sistema no estrutura husi lei ne’e. Karik, aspeitu tolu (3) hosi proposta ne’e kumpre regra konstituisionál ka lae?

Klaru,  tenke kumpre lei konstitusionál. Bainhira halo lei ida mak inkonstitusionál mak sei la lori ba PN. Tenke kumpre ho prinsípiu ne’e konstitusionál ne’e rasik.

Bele esplika mos kompetensia ne’ebé lei ne’e fó?

Kompeténsia ne’ebé lei ne’e fó mak hanesan:

  1. Dezenvolviementu ekonómia;
  2. Ordenamentu territóriu;
  3. Ambiente, konservasaun natureza no rekursu hidriku;
  4. Ekipamentu sosiál no meius komunikasaun;
  5. Asaun sosiál no abitasaun;
  6. Saúde;
  7. Protesaun sívil;
  8. Edukasaun no formasaun profesionál;
  9. Kultura no patrimóniu;
  10. Promosaun ba igualdade jéneru;
  11. Joventude desportu no tempu livre;
  12. Turismu;
  13. Enerjia;
  14. Apoio ba atividade produktiva, liu-liu ho natureza agríkola;
  15. Apoiu ba asaun suku;
  16. Kooperasaun esterna.

Tanbasá mak tenke iha lei poder lokál?

Lei poder lokál iha tanba atu kumpre mandatu konstituisionál artigu 5 no 72. Kona-ba lei eleisaun munisipa ka lokál. Bainhira hatur ona poder lokál mak demokratikamente tenke banati tuir artigu 72. Katak, tenke liuosi eleisaun lokál atu bele dada partisipasaun povu nian hodi tuir eleisaun, nune’e bele espresa sira-nia dereitu atu hili ka eskolla.

Artigo 5 ko’alia kona-ba, primeiru mak Estadu respeita ninia organizasaun territoriál, prinsípiu ba desentralizasaun administrasaun públika. Segundu, lei define fixa ba diferensa karáteristika eskalaun territoriál, hanesan mós kompeténsia administrativa ba respetivu órgaun. Terseiru, Oé-Cusse Ambeno no Ataúro ne’ebé mak goza ona sira-nia tratamentu ba administrativa no ekonómiku espesiál.

Artigu 72 kona-ba poder lokál; primeiru, poder lokál hanesan pesoál koletivu iha territóriu dotada ne’ebé mak maihosi órgaun reprezentativa ho objetivu atu organiza partisipasaun sidadaun nian ba solusaun problema ne’e rasik iha iha komunidade no atu promove dezenvolvimentu lokál no sein prejuízu ba partisipasaun Estadu nian. Segundu mak organizasuan, kompeténsia, funsaun no kompozisaun ba órgaun poder lokál ne’e sei define hosi lei.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here