DILI, 30 dezembru 2020 (TATOLI) Diresaun Nasionál Rejistu Notariadu (DNRN) Ministériu Justisa iha inísiu janeiru to’o dezembru 2020 kontribui reseita $640,970.00 ba kofre Estadu.
Diretór Nasionál Identifikasaun Sivíl no Rejistu Kriminál, Victor da Costa Neto, informa montante reseita ne’e DNRN rekolla ka koleta hosi atendimentu emisaun pasaporte ba ema 10.557.
Ba Agência Tatoli, ohin, via telefone, Victor da Costa Neto, hateten, hosi númeru atendimentu ne’e ho servisu atendimentu pasaporte komún 10.371, pasaporte servisu 91, pasaporte diplomátiku 94 no ema estranjeiru ne’ebé atu trata pasaporte estranjeiru iha na’in-ida.
Reseita $640,970.00 mai hosi atividade fó emisaun pasaporte hosi Munisípiu Dili, Bobonaro, Rejiaun Administrativu Espesiál Oe-Cusse Ambeno (RAEOA) ho munisípiu seluk.
Jornalista: Nelson de Sousa
Editór: Francisco Simões
