Administradór eleitu Munisípiu Lautém, Domingos Sávio. Imajen/Espesiál.

DILI, 30 dezembru 2020 (TATOLI)--Administradór eleitu Munisípiu Lautém, Domingos Sávio, hateten bainhira eleitu sai Administradór Lautém ne’e la’ós tanba opurtunidade maibé tanba responsabilidade hakarak kontribui ba dezenvolvimentu nasionál liuliu ba rai Lautém.

“Fiar ne’ebé mak Governu fó mai ha’u la’ós opurtunidade. Maibé fiar ne’e tanba responsabilidade. Nune’e bainhira fiar no responsabilidade mak ita tanke hala’o knaar ho di’ak ba ita-nia rain, espesiál ba ha’u-nia munisípiu rasik,” Administradór eleitu Munisípiu Lautém, Domingos Sávio, hatete ba Agência TATOLI via telefónika, kuarta ne’e. 

Nia hatutan, la’ós oportunidade mak nia asume knaar ne’e maibé tanba nia fiar katak nia iha responsabilidade hodi kontribui saida mak nia bele hodi dezenvolve ninia rai-deoben Lautém iha loron aban. 

Tanba ne’e, nia informa, planu prioridade ba Munisípiu Lautém nian mak infraestrutura hanesan estrada, bee-moos no eletresidade.

“Maibé ho ne’e, ita presiza servisu hamutuk ho parseiru dezenvolvimentu nasionál no internasionál sira atu oinsá parseiru sira bele implementa sira-nia planu programa iha ita-nia Munisípiu rasik,” nia dehan.

Nia dehan, bainhira infraestrutura la’o loos ona mak automatikamente ekonómiku mós la’o di’ak tanba infraestrutura la la’o mak buat hotu sei falla.

Iha ninia mandatu ne’e, nia dehan, nia parte sei kontinua esforsu atu hatutan servisu saida mak durante ne’e administradór sesante hala’o ona durante ne’e.

“Iha ha’u-nia mandatu ne’e, ha’u tau prioridade espesífiku ba estrada tanba estrada mak bele solusiona ba povu nia moris loron-loron nian,” Domingos hateten.

Administradór Lautém ne’e haktuir, iha estrada balun ne’ebé mak liga ba área potensiál sira tanba ne’e presiza aselera no dezenvolve hodi komunidade bele uza no hodi hala’o sira-nia atividade negósiu balun ba merkadória.

Jornalista: Osória Marques

Editór: Cancio Ximenes

1 KOMENTÁRIU

  1. Agradese ba lider hanesan ne’e… hatene nia knar no toma responsavel ba kargu refere…no mantein responsavel atu konfiansas labele lakon iha dalan klaran no laos fila hodi kritika fali ita…! Responsabilidade importante…
    lalika rona ida ne’e no ida ne’eba maibe fo ona konfiansa ba ita boot ne’e tamba fiar ita nia kapasidade. No ita mak iha direitu masimu iha munisipiu wainhira ita halo buat diak ba ita nia municipiu ema hotu sei louva ita boot no halo buat foun atu sai hanesan mata dalan no dalan uniku maibe ho objetivu ida deit Dezenvolvimentu iha setor hotu…!

HAKEREK NO HATÁN

Please enter your comment!
Please enter your name here